Руските сили утрово нападнаа детска градинка во Харков користејќи беспилотни летала, соопштија највисоки украински претставници.
„Имаше директен погодок врз приватна градинка во областа Кхолоднијаркиј во Харков, при што избувна пожар“, изјави градоначалникот на Харков, Игор Терехов.
Според првичните информации, загинал еден возрасен маж, додека сите 48 деца биле евакуирани од местото на нападот. Децата не се здобиле со телесни повреди, но, според украинските власти, биле во состојба на тешка стресна реакција.
Претседателот на Украина, Володимир Зеленски, соопшти дека во нападот се повредени уште седум лица и дека сите повредени добиваат медицинска помош.
„Сите деца се евакуирани и се наоѓаат во засолништа. Според првичните податоци, многу од нив имаат акутна стресна реакција“, напиша Зеленски на социјалните мрежи.
„Нема и не може да има никакво оправдување за напад со дрон врз детска градинка. Русија станува сè подрска. Овие напади се шлаканица за сите што инсистираат на мирно решение. Бандитите и терористите можат да се запрат само со сила“, порача украинскиот претседател, пренесува Politico.
