Русија пред два дена изврши силен напад досега врз трафостанците поврзани со украинските нуклеарни електрани, со што производството на електрична енергија од нуклеарките е намалено за околу 50 проценти. Ова го соопшти Виталиј Зајченко, извршен директор на државниот оператор на електричната мрежа „Укренерго“ за Kyiv Independent. Украина успеала да ја поправи една од трафостанците, но состојбата останува критична, додаде Зајченко.
Русија ја таргетирала високонапонската инфраструктура што ги поврзува трите активни украински нуклеарни електрани со мрежата, поради што еден реактор мораше целосно да биде исклучен. Веднаш по нападот, низ целата земја беа воведени дополнителни рестрикции на електрична енергија, во време на најстудената зима од почетокот на руската инвазија.
Мета на нападот биле и други енергетски објекти, вклучувајќи термоелектрани, што дополнително ја ограничило достапноста на електрична енергија и ја продлабочило веќе постоечката енергетска криза.
Нуклеарната енергија останува последна линија на спас за разурнатиот украински енергетски сектор, додека Русија систематски ги уништува другите видови електрани. Иако Москва директно не ги напаѓала самите електрани, украинската воена разузнавачка служба предупреди дека Русија преку уништување на трафостанциите настојува да ги исклучи нуклеарките од мрежата.
Нуклеарките се зависни од електрична енергија за работа на системите за безбедност, вклучувајќи и системите за ладење на реакторите. Доколку активна електрана се исклучи од мрежата, таа се потпира на резервни дизел генератори. Доколку тие генератори не успеат, нуклеарна катастрофа би можела да се случи во рок од неколку часа.
„Ова не е добра ситуација за нуклеарната безбедност“, изјави Зајченко.
Претседателот Володимир Зеленски ги осуди нападите, кои се случија во време кога Киев, Вашингтон и Москва водеа мировни преговори. На денешната владина седница, Зеленски потенцираше дека партнерите мора да обезбедат дополнителна заштита на инфраструктурата поврзана со нуклеарните електрани, вклучително и повеќе противвоздушни системи и побрза испорака на проектили.
„Нашите нуклеарни електрани… остануваат практично постојани цели. Тоа бара поинакво ниво на реакција од она што го имаме сега“, напиша Зеленски на Telegram, додавајќи: „Ние треба повеќе заштита и повеќе комуникација со партнерите, за светот да не молчи за оваа закана.“
