Русија рано утринава го изведе најсилниот и најконцентриран бран ракетни напади врз два од најголемите украински града оваа година, објавија украински официјални лица и медиуми. При тоа, во североисточниот град Харков загинаа четири лица.
Шефот на воената управа на Киев, Тимур Ткаченко, изјави дека главниот град Киев бил изложен на краток, но интензивен ракетен напад.
Очевидци на Reuters изјавија дека слушнале експлозии во градот, но засега нема официјални информации за жртви или материјална штета. Телеграм-канали кои ја следат ситуацијата во Украина наведоа дека во текот на ноќта, во период од околу еден час, биле лансирани приближно 20 балистички проектили, опишувајќи го нападот како најинтензивен оваа година. Reuters не можел независно да ги потврди овие тврдења.
Украинските вооружени сили засега не го коментирале целосниот обем на нападите, а од Русија немало официјален коментар за ракетните удари.
