Руските медиуми и Телеграм-каналите шират извештаи дека Русија наводно ги држи телата на 40.000 мртви украински војници. Според овие наводи, кои ги цитираат американскиот медиум Политико, Украина одбива да ги прими телата за да избегне исплата на отштета на семејствата на војниците.
Меѓутоа, ова е лажна вест. Политико не објавил таков извештај. Извор на оваа дезинформација е рускиот медиум Life.ru, кој во својата публикација вклучил линк до веб-страницата на Политико, иако таква статија не постои на страницата.
Life.ru е познат по ширењето антиукраинска пропаганда. На пример, новинарите од Укринформ ја демантираа лажната приказна на Life.ru, според која еден американски град се преименувал во „Одеса“ поради наводното „руско“ потекло на името.
Дополнително, рускиот државен медиум ТАСС пласираше лажна приказна дека украинските наплатувачи на долгови наводно контактираат со Русија за да дознаат за судбината на должниците кои служат во украинската војска, со цел да ги надоместат долговите доколку тие се заробени или загинати.
И оваа приказна е невистинита. Статијата се повикува на неименувани руски безбедносни извори и не дава проверливи факти или примарни извори.
Овие измислени приказни се дел од поширока информациска операција насочена кон Украина, поврзана со договорот постигнат на 2 јуни во Истанбул за репатријација на телата на 6.000 паднати војници. Украинскиот центар за борба против дезинформации при Советот за национална безбедност и одбрана (НСДЦ) претходно предупреди за вакви дезинформациски кампањи поврзани со размената на тела.
Според украинскиот министер за одбрана Рустем Умеров, кој ја предводеше украинската делегација во Истанбул, договорената размена се базира на моделот „6.000 за 6.000“.
Во Русија, надоместокот за паднат војник изнесува 5 милиони рубли, што за 6.000 тела значи околу 30 милијарди рубли.
Поради ова, руската влада активно ги прикрива своите воени загуби. Последен пат кога руските власти јавно објавија бројка за загинатите беше на 21 септември 2022 година, кога пријавија 5.937 мртви. Според Генералштабот на украинските вооружени сили, вистинскиот број на руски жртви веќе достигна еден милион.
Претходно, руската пропаганда измисли и приказна за масовни дезертерства меѓу украинската војска по операцијата „Пајажина“.
Извор: Ukrinform
