Американскиот државен секретар Марко Рубио изјави дека следната недела ќе одржи средба со дански официјални претставници, по обновениот интерес на Соединетите Американски Држави за преземање на Гренланд.
Неговата изјава следува откако министрите за надворешни работи на Гренланд и на Данска побараа состанок со највисокиот американски дипломат.
Рубио, повторувајќи го ставот на Белата куќа изнесен претходно оваа недела, не ја исклучи можноста за американска воена интервенција со цел стекнување контрола врз Гренланд, доколку претседателот Доналд Трамп процени дека тоа е неопходно за националната безбедност на САД. Притоа, тој нагласи дека зборува во општи рамки.
„Секој претседател секогаш ја задржува таа опција. Не зборувам конкретно за Гренланд, туку воопшто – доколку претседателот идентификува закана за националната безбедност на Соединетите Американски Држави, секој претседател ја задржува можноста да одговори со воени средства“, изјави Рубио.
Во исто време, тој истакна дека намерата на Трамп отсекогаш била Гренланд да се купи, потсетувајќи дека оваа идеја јавно ја изнел уште за време на својот прв претседателски мандат.
„Ова не е ништо ново. За тоа зборуваше уште во својот прв мандат. И тој не е првиот американски претседател што размислувал како Соединетите Американски Држави би можеле да го стекнат Гренланд“, рече Рубио, додавајќи дека и поранешниот претседател Хари Труман ја разгледувал таа можност.
Рубио нагласи дека дипломатијата секогаш има предност при решавањето на вакви прашања, правејќи директна паралела со ситуацијата во Венецуела. Според него, администрацијата на Доналд Трамп првично се обидела проблемот да го реши преку дипломатски канали.
„Повеќепати се обидувавме да постигнеме решение кое нема да подразбира интервенција и апсење на обвинет нарко-трговец. За жал, тие обиди не беа успешни“, изјави Рубио, осврнувајќи се на случајот со Венецуела, пренесува CNN.
