Родовиот јаз во платите е многу повеќе од еднаква плата за еднаква работа. Жените во Европа се соочуваат со големи нееднаквости во пристапот до работа, напредување и награди. Неколку индикатори ја покажуваат нееднаквоста меѓу жените и мажите во многу области, но економскиот живот е една од клучните области што најмногу ги засега жените.
И покрај некои подобрувања во Европа, жените сè уште страдаат од родови јазови кога станува збор за платите, учеството на работната сила, вработувањето и хиерархиските позиции на работното место.
,,Euronews Next“ објавува дека неприлагодениот родов јаз во платите е значаен показател, кој ја покажува разликата помеѓу просечната бруто часовна заработка на мажите и жените.
Во 2022 година, родовиот јаз беше 12,7 отсто во ЕУ. Со други зборови, жените во просек заработувале 12,7 отсто помалку на час од мажите. Ова покажува дека жените во просек заработуваат 87,3 евра за секои 100 евра заработени од мажите. Накратко, жените би требало да работат дополнителни 1,5 месеци за да ја надополнат разликата.
Естонија имаше најголем јаз во платите меѓу половите од 21,3 отсто, а потоа следат Австрија (18,4 отсто), Швајцарија и Чешка (и двете од 17,9 отсто). Луксембург (-0,7 отсто) беше единствената земја со негативна бројка, што значи дека жените заработувале нешто повеќе од мажите. Освен Луксембург, Италија, Романија и Белгија имаат најнизок јаз во платите меѓу половите, помалку од пет отсто. Меѓу „големата четворка“ на ЕУ, Германија (17,7 отсто) и Франција (13,9 отсто) имаа поголеми јазови од просекот на Унијата.
Една од целите на Европската комисија е да го намали родовиот јаз во платите во блокот. Помеѓу 2012 и 2022 година, родовиот јаз во платите се намали за 3,7 процентни поени (п.п.) во ЕУ, што е намалување од 16,4 на 12,7 отсто. Сепак, јазот во платите се зголеми во шест земји. Во Словенија, Латвија, Полска, Малта, Швајцарија и во Литванија, родовиот јаз во платите се зголеми, и се движи од 0,1 п.п. до 3,7 п.п.
Во 2022 година, родовиот јаз беше поголем во приватниот сектор од јавниот во 21 од 24 европски земји. Според агенцијата за податоци на ЕУ, Еуростат, ова може да се должи на фактот што платите во јавниот сектор главно се одредуваат со транспарентни методи на пресметки на платите кои подеднакво се применуваат и за мажите и за жените во ЕУ.
