Тим научници од Јужнокорејскиот напреден институт за наука и технологија (KAIST), предводен од професорот Кванг-Хјун Чу од Одделот за биоинженерство и инженеринг на мозокот, објавија револуционерна технологија. Тие успеале да лечат рак на дебело црево со трансформирање на канцерогените клетки во состојба слична на нормалните клетки на дебелото црево, избегнувајќи ги притоа несаканите ефекти од уништувањето на клетките.
Научниците забележале дека при процесот на онкогенеза (создавање на канцерогени клетки), нормалните клетки регресираат по нивниот пат на диференцијација. Врз основа на ова откритие, тимот создал „дигитален близнак“ – модел на генетската мрежа поврзана со процесот на диференцијација на нормалните клетки.
Користејќи го дигиталниот модел на нормалниот развој на клетките, научниците идентификувале неколку молекули, наречени „главни регулатори“, кои го регулираат процесот на диференцијација на клетките што ги обложуваат ѕидовите на цревата. Регулаторите MYB, HDAC2 и FOXA2, кога биле потиснати кај клетките на рак на дебело црево, ги вратиле клетките во нормална состојба, целосно елиминирајќи ја заканата од рак.
Ова откритие, потврдено преку молекуларни и клеточни експерименти, како и студии на животни, покажува дека реверзијата на канцерогените клетки може системски да се постигне. Ова отвора нови можности за развој на терапии за рак кои ќе бидат применливи за различни видови рак, со минимални несакани ефекти.
Овој пробив претставува значаен чекор напред во борбата против ракот, носејќи надеж за поефективни и побезбедни терапии.
