На првата изложба на Зрно фестивалот, насловена како „Sehschärfenbestimmung/Проверка на диоптријата“, во соработка со Galerie Guerilla од Виена и КСП Центар – Јадро, ќе учествуваат 60 автори. На ревијалната поставка која ги обединува љубителите на аналогната фотографија од Европа и пошироко, голем дел од авторите/авторките се учесници на работилниците за благородни фотографски постапки кои ги организира Зрно фестивалот.
Во рамките на оваа изложба, авторите ќе се претстават со по едно дело, нудејќи широк спектар на креативни изрази и техники.
„Оваа изложба е можност да се доживее богатството на современата аналогна фотографија, која доживува своевидна ренесанса во светот. Во денешно време вистинските уметници се заситени од алгоритми врз кои немаат контрола, дела кои немаат авторски печат и тактилна димензија. Аналогната фотографија и старите благородни техники, кои ги негува Зрно фестивалот, стануваат се попопуларни во светот на современата уметност. Оваа година мото на Зрно фестивалот е: Фотосинтеза! – Зрно ги обединува авторите од светот и се храни со светлината. Внатрешна и надворешна“, пишува во соопштението.
Од Македонија учествуваат: Кети Талевска-Бакревска, Мартина Павлоска, Сара Ислам, Сашо Алушевски, Еџе Али, Анѓела Танчевска и Филип Ицовски.
Изложбата се отвора во вторник, 8ми Април, во 20.00 часот во КСП Центар – Јадро.
