„Реткото момче“ е централниот лик во новиот серијал приказни што Фондацијата за образовни и културни иницијативи „Чекор по Чекор“ – Македонија го најави по повод 28 февруари, Меѓународниот ден на лицата со ретки болести. Преку серија објави, ќе бидат споделени искуства на дете кое живее со ретко заболување. Првата приказна од циклусот носи наслов „Реткото момче и зборливото балонче“, автор е Наташа Анѓелеска, а достапна е како сликовница на веб-страницата на фондацијата.
Серијалот се темели на реални ситуации од секојдневието на дете со хередитарен ангиоедем (ХАЕ) – состојба која, како што посочуваат од фондацијата, може ненадејно да го наруши вообичаениот тек на детството и да наметне престој во болница токму во моменти кога детето сака да биде со своите врсници. Во првата сликовница, дејството започнува со сцена блиска до многу семејства: роденденска прослава што ненадејно мора да заврши затоа што следува итно заминување во болница.
Од фондацијата објаснуваат дека приказните се раскажани со топол и емотивен тон, надополнет со илустрации од Александар Сотировски, со цел темата за ретките заболувања да стане подостапна и разбирлива и за децата и за возрасните. Преку нарацијата се отвора простор за разбирање на животот со ретка болест, за согледување на значењето на поддршката и за поттикнување емпатија во семејството, училиштето и меѓу врсниците.
Фондацијата најавува дека во наредниот период ќе следуваат и други наслови од серијалот, како дел од одбележувањето на 28 февруари. Целта е јавноста да добие појасен и поблизок увид во предизвиците со кои се соочуваат децата што живеат со ретки заболувања, како и во начините на нивно прифаќање и поддршка.
