Рекордни температури повисоки од 40 степени Целзиусови беа забележани оваа недела во Кина, јавија државните медиуми. Кина последниве неколку години се соочува со екстремни метеоролошки услови – од горештини и суши, до силни дождови и поплави.
Како најголем емитер на стакленички гасови во светот, Кина истовремено е и водечки производител на обновлива енергија и има цел да постигне јаглеродна неутралност до 2060 година.
Меѓу најпогодените градови од топлотниот бран е Џенгџу, метропола со 13 милиони жители и главен град на централната провинција Хенан, каде денеска се измерени 41 степен Целзиусови, јави државната телевизија CCTV.
Во местото Линџоу, северно од Џенгџу, температурата се искачи до 43,2°C, додека во градот Шахе, во северната провинција Хебеи, беа забележани 42,9°C, соопшти Националната метеоролошка служба.
Се очекува екстремните температури да опаднат до петок, на некои места дури и за 15 степени.
Кина значително ги зголеми капацитетите за енергија од ветер и сонце последниве години, со цел да ја намали зависноста од јагленот, кој е многу загадувачки енергетски извор.
Сепак, експертите предупредуваат дека земјата заостанува со еден од своите клучни климатски цели – намалување на интензитетот на јаглерод (емисии во однос на БДП) за 65% до 2030 година во споредба со 2005.
Зголемувањето на обновливата енергија резултираше со намалување на емисиите на CO₂ за 1,6% во првиот квартал од 2025, според Лаури Милвирта од Центарот за енергетски истражувања и чист воздух (CREA).
Минатиот месец, Кина објави дека за првпат капацитетот за енергија од ветер и сонце го надминал производството на термоелектрани на јаглен.
Но, и покрај растот на обновливите извори, Кина во 2024 година започна изградба на термоелектрани на јаглен со капацитет од 94,5 GW, што претставува 93% од светскиот раст на термоелектрани минатата година, според извештајот на CREA и Global Energy Monitor (GEM).
Производството на јаглен во Кина постојано расте, достигнувајќи од 3,9 милијарди тони во 2020 до 4,8 милијарди тони во 2024 година.
