Чилеанскиот Red Bull спортист и поранешен воен пилот Sebastián “Ardilla” Álvarez испиша нова страница во историјата на воздушните спортови. Во рамките на проектот Red Bull Starman, тој направи историски wingsuit лет, со кој постави три нови светски рекорди за најголема брзина, најголема измината дистанца и најдолг лет – само со еден скок!
Álvarez го започна својот подвиг над Whiteville, Тенеси, каде што скокна од авион на 12.640 метри височина. Целта беше да ја искористи моќта на млазните струи и да ги помести границите на овој спорт.
За само 30 секунди од скокањето, Álvarez достигна брзина од 550 км/ч, рушејќи го претходниот рекорд со разлика од речиси 130 км/ч. За споредба, ова е побрзо и од најбрзиот болид во историјата на Формула 1 (372,5 км/ч)!
Во текот на 11 минути и 1 секунда, тој прелета 53,45 километри, што претставува речиси двојно поголема дистанца од претходниот рекорд за должина на лет.
Michael Cooper, официјален судија на Меѓународната аеронаутичка федерација, истакна:
“Ова не се мали подобрувања, туку значајни промени на три различни рекорди. Обично, пилотите се фокусираат на само еден аспект – брзина, должина или времетраење на летот – но Sebastián успеа да ги избалансира сите три. Ова е лет со беспрекорна аеродинамика и техничка изведба.”
За оваа мисија, Álvarez две години имаше интензивни подготовки:
- 11 часа тренинг во воздушен тунел во Шведска за подобра контрола на летот
- Специјален кислороден тренинг за адаптација на услови со ниска концентрација на кислород
- Физички тренинг за сила и издржливост, со фокус на рамената и горниот дел од телото
- Строг нутриционистички режим за оптимална тежина и подобрена аеродинамика
На екстремни височини, каде што температурата достигнува минус 100°C, а брзината на ветерот е 200 км/ч, секој детал е клучен, а самиот лет е вистински тест за ментална и физичка издржливост. За да ги издржи овие услови, Álvarez носеше специјален систем за кислород, посебна кацига отпорна на екстремни ветрови и ниски температури, како и грејни слоеви под своето wingsuit одело за дополнителна заштита од мрзнење.
Без оваа опрема, вентилите за кислород би можеле да замрзнат, што би довело до губење на свеста за неколку секунди.
Sebastián и неговиот тим соработуваа со експерти од авио-индустријата за да создадат ултра-напредно wingsuit одело со специјални аеродинамични подобрувања како продолжетоци на врвовите на крилјата, кои ја зголемуваат стабилноста и ефикасноста на летот и аеродинамични облоги околу нозете, кои го намалуваат отпорот на воздух за поголеми брзини и подолги летови
И покрај технолошките подобрувања, летот бараше извонредна физичка сила и вештина за да се одржи прецизна контрола во воздухот.
Matt Gerdes од компанијата Squirrel Wingsuits, која го дизајнираше оделото, истакна:
“Ова не е обично wingsuit одело, туку технички и физички најпредизвикувачкиот модел кој некогаш сме го направиле. Потребна е исклучителна прецизност и издржливост за да се совлада. Seba долго тренираше за ова.”
Sebastián Álvarez не е само екстремен спортист – тој е поранешен воен пилот, со речиси две децении искуство во wingsuit летови. Со неговите претходни подвизи, како легендарниот скок во вулканот Villarrica во 2021, познат е како како еден од најиновативните и најхрабрите спортисти во светот.
“Оваа мисија не беше само за мене. Сакавме да покажеме дека границите постојат само за да бидат поместени. Никој досега не се обидел да урне три рекорди во еден скок – но со добра подготовка, напорна работа и вистинската технологија, успеавме. Ова е доказ дека дисциплината и упорноста можат да го направат невозможното возможно.” – изјави Álvarez.
Ова се трите рекорди кои беа срушени со само еден wingsuit лет:
- Најголема брзина: 550 км/ч (претходен рекорд 421 км/ч)
- Најголема измината дистанца: 53,45 км (претходен рекорд 29,06 км)
- Најдолг лет: 11 минути и 1 секунда (претходен рекорд 9 минути и 31 секунда)
