„Присила“ е најновиот филм на Софија Копола, режисерка позната по своите суптилни и визуелно
богати кино ракописи. Филмот е адаптација на книгата мемоари „Елвис и јас“ од Присила Присли,
и го прикажува животот на Присила од нејзина перспектива, фокусирајќи се на долгогодишната
врска со кралот на рокенролот-Елвис Присли.
Филмот доби позитивни рецензии и признанија од филмската критика. На 80-от Венецијански
филмски фестивал, актерката Кајли Спејни ја освои наградата „Купа Волпи“ за најдобра актерка
токму за нејзината улога во проектот. Филмот исто така беше номиниран за „Златен лав“ на истиот
фестивал. Беше прикажан и на 28-от Софиски филмски фестивал, каде што привлече навистина
големо внимание од публиката.
Приказната започнува со моментот на запознавањето на младата Присила (Кајли Спејни) со Елвис
(Џејкоб Елроди) кога таа имала само 14 години. Филмот ја следи нивната сложена и често
контроверзна врска, прикажувајќи го гламурот и раскошот на животот со рок-иконата, но и
тешкотиите и притисоците со кои се соочувала.
Кајли Спејни во улогата на Присила носи автентичност и искреност, прикажувајќи го нејзиниот лик
со доза на ранливост, но и ментална сила. Џејкоб Елроди го толкува легендарниот пејач со
потребната доза на харизма и комплексност. Хемијата помеѓу Спејни и Елроди додава ниво на
уверливост на целата приказна и ја прави динамиката меѓу ликовите веродостојна, а на моменти
и трогателна.
Музиката во биографскиот филм претставува клучен елемент што го отсликува емотивниот свет на
главниот лик. Со суптилно избрани песни кои го комбинираат духот на ерата со интимноста во
нарацијата, Копола создава звучен пејзаж што ја нагласува ранливоста а истовремено и силата на
Присила. Саундтракот ја избегнува очекуваната доминација на хит-песните, фокусирајќи се на
музика што ја рефлектира перспективата на Присила, притоа додавајќи свежина и нов агол и во тој
аспект на филмот.
Софија Копола, како и во своите претходни филмови, повторно ја покажува истенчената визуелна
естетика. „Присила“ е исполнет со внимателно изработени сцени, кои ги доловуваат различните
емотивни состојби на Присила. Копола ја користи светлината, бојата и музиката за да создаде
атмосфера која е истовремено гламурозна и меланхолична, што совршено ја комплементира
сложеноста на наративот.
Филмот ги истражува темите на идентитетот, моќта и личната слобода. Преку призмата на
Присила, Копола ги прикажува предизвиците со кои се соочуваат жените во врски со моќни и
влијателни мажи. Филмот поставува прашања за природата на љубовта и жртвите што често се
прават и се неопходни за да се одржи таа љубов, прикажувајќи ја Присила како силен и самостоен
лик кој се бори да го најде своето место во разбрануваниот и многу често хаотичен свет на шоу
бизнисот и естрадата.
„Присила“ е интимен и емотивен портрет на жена која живее во сенката на глобалната икона, но
која на крајот успева да ја пронајде својата вистинска суштина. Софија Копола со својата
режисерска вештина и со прекрасните изведби на Кајли Спејни и Џејкоб Елроди успева да создаде
трогателен и визуелно одлично сработен филм кој ќе остане во сеќавањето на гледачите. За
љубителите на биографските драми и фановите на Елвис Присли, „Присила“ е повеќе од
задолжително гледање.
