Јужнокорејски истражувачи развија лесен робот за носење кој може да оди до лицата со параплегија и да се „заклучи“ на нив, овозможувајќи им да одат, да маневрираат при некоја пречка и да се качуваат по скали.
Тимот на Егзоскелетната лабораторија на Корејскиот напреден институт за наука и технологија (KAIST) рече дека нивната цел е да создадат робот кој беспрекорно се интегрира во секојдневниот живот на лицата со попреченост.
Ким Сеунг-Хван, кој и самиот е параплегик и дел од тимот на KAIST, го демонстрираше прототипот кој му помогна да оди со брзина од 3,2 км на час (2 милји на час), да се качи по скали и да направи странични чекори за да се седне на клупата.
„Може да ми пријде каде и да сум, дури и кога седам во инвалидска количка и да го носам за да ми помогне да станам, што е една од неговите најизразени карактеристики“, рече Ким.
Егзоскелетот со погон, наречен WalkON Suit F1, има состав од алуминиум и титаниум со тежина од 50 кг (110 lb), а се напојува од 12 електронски мотори кои симулираат движења на човечки зглобови при одење.
Парк Јеонг-су, исто така член на тимот на KAIST, рече дека е инспириран од филмот „Iron Man“. „Откако го гледав Iron Man, помислив дека би било одлично ако можам со робот да им помогнам на луѓето во реалниот живот.
За да се обезбеди рамнотежа на корисникот додека оди, роботот е опремен со сензори на стапалата и во горниот дел од телото кои следат 1.000 сигнали во секунда и ги предвидуваат наменетите движења на корисникот.
Леќите на предниот дел на роботот работат како очи кои ја анализираат неговата околина, ја идентификуваат висината на скалите и откриваат пречки за да се компензира недостатокот на сетилна способност на корисниците со целосна параплегија. Ким Сеунг-Хван го освои златниот медал носејќи го WalkON Suit F1 во категоријата егзоскелет на Cybathlon 2024.
