Уредувањето на балконот може да биде едноставно, прекрасно и практично – доколку ги одберете вистинските растенија. Многу луѓе се двоумат кога купуваат цвеќиња за балкон бидејќи не секоја билка поднесува директно сонце, сенка или високи температури. Но постојат растенија кои успеваат речиси насекаде, а притоа не бараат голема грижа.
Овие пет растенија се идеални за мали и големи балкони, за почетници и за сите што сакаат без многу напор да внесат зеленила и боја во својот дом.
Чуваркуќа (Sempervivum)
Овој долговечен сукулент е совршен избор за секој балкон. Поднесува и светлина и сенка, екстремни температури и нередовно полевање. Како и повеќето сукуленти, не бара честа грижа, а својот декоративен изглед го задржува во текот на целата година.
Пркос (Portulaca grandiflora)
Пркосот е едно од најпопуларните декоративни цвеќиња за саксии и градини. Успева и на сонце и на сенка, а може да издржи и пониски температури. Наводнувањето треба да биде умерено – само кога почвата ќе се исуши одозгора. Цветовите се многу издржливи и во боите на летото внесуваат живост на секој балкон.
Пеларгонија (Pelargonium)
Можеби најпознатото балконско цвеќе кај нас. Пеларгонијата, или народски кажано сардела, е омилена поради обилното и долго цветање. Вирее најдобро на светло место, но ја поднесува и сенката. Наводнувајте умерено, кога почвата ќе биде речиси сува.
Бугенвилија (Bougainvillea)
За оние што сакаат впечатлива боја и медитерански дух – бугенвилијата е идеален избор. Ова растение сака сонце, но може да расте и во делумна сенка. Отпорно е на суша и може да поднесе многу високи температури. Штом ќе се навикне на својата саксија, цвета изобилно и долго.
Воденика (Impatiens)
Водениката успева и на сонце и на сенка, но најдобра е позицијата каде што нема цел ден директно сонце. Бара малку повеќе наводнување од останатите растенија, но е исклучително благодарна и брзо се раззеленува. Важно е почвата да биде влажна, но не и натопена.
Овие пет растенија се одлична комбинација за секој што сака да го разубави својот балкон без голема обврска и без страв дека растенијата ќе овенат. Поднесуваат различни услови, брзо се адаптираат и внесуваат свежина, боја и живост во урбаниот простор.
