Повеќе од милион луѓе во Либан биле приморани да ги напуштат своите домови од 2 март, кога Израел започна со бомбардирање на земјата, соопштија либанските власти. Нападите следуваа откако Хезболах, милитантна група поддржана од Иран, испука ракети кон Израел како одговор на убиството на иранскиот врховен лидер Али Хамнеи во заеднички американско-израелски воздушен напад.
Медицинската хуманитарна организација „Лекари без граници“ (MSF) истакна дека масовното раселување на цивилите е резултат на „немилосрдното израелско бомбардирање и опсежни наредби за евакуација кои не штедат никого“. Луѓето систематски биле приморани да ги напуштаат своите села.
Според MSF, се забележува сличен образец на оној од последните две и пол години во Газа: постојани наредби за евакуација, раселување на илјадници семејства и бомбардирање на густо населени подрачја. „По 15 месеци кревко примирје кое не го запре насилството во Либан, семејствата повторно се најдоа меѓу бегство и бомбардирање“, изјави портпаролот на организацијата.
Поради продолжените напади врз стамбени подрачја, стотици училишта и јавни згради се претвораат во привремени засолништа. Многу луѓе се приморани да спијат во импровизирани шатори или на улица поради пренатрупаните објекти.
Израелската војска објави дека започнала копнена офанзива во нови делови на јужен Либан, што ги засили стравувањата од продолжителен конфликт. Израелскиот министер за одбрана, Израел Кац, предупреди дека раселените Либанци нема да можат да се вратат додека не се обезбеди безбедност на Израелците покрај границата.
Според либанските власти, во израелските напади од 2 март загинале најмалку 886 лица, вклучувајќи 111 деца.
