Катерина Петровска, која поминала низ сопствено искуство со рак на дојка во 2008 година, сподели дека тогаш имало околу 2.000 пациенти во Битола, а најмладата пациентка била веднаш по пубертетот. „Жените често ги избегнуваат прегледите поради стравот од дијагнозата. Многу е важно да зборуваме за оваа болест, бидејќи само преку свесност можеме да ја намалиме смртноста,“ истакна Петровска.
Градоначалникот на Битола, Тони Коњановски, на трибината информираше дека од 1.600 жени кои се лекувале, 550 биле на возраст од 65 до 75 години, додека смртноста од рак на дојка во 2023 година достигнала 356 случаи. „Тоа значи дека секој ден по едно лице губи живот од оваа болест,“ рече Коњановски, нагласувајќи ја потребата од подигнување на свесноста за важноста на самопрегледите и раната детекција.
Претседателката на Советот на Општина Битола, Габриела Илиевска, додаде дека е неопходно да се обезбедат повеќе термини за мамографски прегледи и да се охрабрат жените да се јават на преглед. „Потребно е да се намали стигмата околу болеста и да ги поттикнеме жените да се грижат за своето здравје,“ рече Илиевска.
Здравствените работници на трибината посочија на неколку фактори кои го зголемуваат ризикот од рак на дојка. Специјалистите предупредија дека жените кои имаат рана менструација или доцна менопауза се изложени на поголем ризик. Д-р Михајло Вангелов ја истакна важноста на редовните прегледи како главна превентивна мерка, додека д-р Весна Шиколовска ги поврза пушењето и консумирањето алкохол со зголемениот ризик од развој на болеста.
Настанот повика на поинтензивна борба против стигмата и подигнување на свесноста за раното откривање и превенција, како клучни чекори во намалување на бројот на случаи и смртноста од рак на дојка во земјата.
