Бугарскиот сервис на Радио Слободна Европа ќе престане со работа на 31 март поради прекин на финансирањето од САД, објави агенцијата АФП повикувајќи се на двајца членови на персоналот. Слична одлука беше претходно најавена и за сервисот во Романија.
„Тимот активно работи на решение кое ќе ни овозможи да продолжиме да им служиме на нашата публика“, рече еден од изворите, барајќи анонимност додека не се објави официјално соопштение. Директорката на РСЕ Романија, Елена Вијулие Танасе, исто така потврди дека радиото ќе престане со работа на 31 март, истакнувајќи дека „останале само неколку професионални новинари, додека времињата бараат работа на многу фронтови“.
Павол Салај, директор на Репортери без граници, изјави дека затворањето „ќе го загрози правото на граѓаните на веродостојни информации“ и дека ризикот е особено голем во Бугарија, која се подготвува за избори и има малку независни медиуми.
Историјата на Радио Слободна Европа покажува дека од своето основање во 1950 година, радиото им служело на граѓаните надвор од комунистичките режими, вклучително и во Бугарија и Романија, и било делумно финансирано од ЦИА до почетокот на 1970-тите. Станицата играла клучна улога во ширењето информации надвор од Железната завеса, соочувајќи се со редовни обиди на комунистичките власти да го попречат сигналот и со вознемирувања на новинарите.
Претходно, радиото беше затворено и во Унгарија на крајот на ноември, како резултат на одлуката на американската влада во контекст на политичките односи со премиерот Виктор Орбан.
