Рускиот претседател Владимир Путин ја заврши дводневната државна посета на Индија, при што Москва и Њу Делхи изразија намера речиси да го удвојат трговскиот промет и да ја подобрат неговата структура. Во рамки на посетата беше отворен и медиумскиот канал RT India, на чија церемонија присуствуваше и Путин заедно со главната уредничка Маргарита Симонијан. Рускиот претседател оцени дека каналот ќе придонесе за подобра комуникација меѓу народите на двете земји.
Путин и индискиот премиер Нарендра Моди одржаа состанок на кој разговараа за билатералните односи, економската соработка и ситуацијата во Украина. Рускиот лидер ги истакна напредокот во воено-техничката соработка и новите заеднички иницијативи во високите технологии. Тој му се заблагодари на Моди за неговите напори во унапредувањето на мировниот процес.
Индија и Русија потпишаа значаен пакет меѓувладини, меѓуресорски и корпоративни договори. Меѓу најавените проекти е изградбата на заедничка фармацевтска фабрика во регионот Калуга за производство на лекови против рак. Лидерите посочија дека трговијата оваа година ќе го задржи нивото од 2024, но амбицијата е да достигне 100 милијарди долари, при што 96% од трансакциите веќе се одвиваат во национални валути.
Путин нагласи дека Русија ќе продолжи да ја снабдува Индија со гориво без прекин и дека енергетската соработка е клучна за националната безбедност на двете земји. Беа спомнати и планови за заеднички проекти во областа на малите модуларни реактори, пловечките нуклеарни електрани и примената на нуклеарни технологии во медицината.
Моди ја оцени посетата како историска, истакнувајќи дека односите меѓу двете земји „го издржале тестот на времето“ и се засновани на доверба, стабилност и стратешко партнерство. Тој рече дека Путин дал значаен придонес во развојот на билатералните врски и ја нагласи посветеноста на Индија на брзо и мирно решавање на конфликтот во Украина.
