Еден помалку познат планински масив во северна Шпанија, Picos de Europa, според изборот на Time Out е прогласен за најубавото место на планетата, оставајќи ги зад себе и светски познатите Алпи, Анди и Хималаи. Овој импресивен предел е дел од Кантабријските Планини и се протега низ регионите Астурија, Кантабрија и Кастиља и Леон, на само дваесетина километри од морскиот брег.
Со својот највисок врв, Torre de Cerredo, кој достигнува 2.650 метри надморска височина, овој регион нуди спектакуларни глетки каде планините драматично се издигнуваат над морето. Од видиковците се отвораат панорами кон длабоки кањони, остри врвови, но и кон песочни плажи и разбрануваното Кантабријско Море, создавајќи уникатен спој на планински и крајбрежен пејзаж.
Во рамките на националниот парк се наоѓаат и бројни природни и културни знаменитости. Меѓу нив се издвојува впечатливиот врв Naranjo de Bulnes, традиционалните планински села Сотрес и Каин, како и глацијалните езера Covadonga Lakes и светилиштето Ковадонга, сместено во карпа над водопад.
За љубителите на активниот туризам, особено се препорачува планинарската патека Ruta del Cares. Оваа позната рута долга околу 23 километри минува низ живописен кањон, опкружен со стрмни карпи и водопади, и важи за една од најатрактивните во регионот.
На листата на најубави места во светот на Time Out, покрај Picos de Europa, се најдоа и Komodo National Park, Morgan Library and Museum, долината Douro Valley, како и Big Sur, Ullswater, стариот дел на Bologna, Capo Testa, Victoria Falls и долината Punakha Valley.
