Папата Лав е повоздржан и поформален од харизматичниот Франциск, но подеднакво храбар кога станува збор за изразување на ставови, дури и за чувствителни теми како општествената правда, сиромаштијата и миграциите.
„Папата комуницира преку начинот на облекување, гестовите и симболите“, изјави за AFP Роберто Реголи, италијански свештеник и професор на Папскиот универзитет Грегоријана во Рим.
Додека „стилот на Франциск беше силно поврзан со неговите зборови“ и импровизацијата, Лав XIV, според Реголи, емоциите ги пренесува „со лицето и продорниот поглед“.
Роберт Френсис Превост на 8 мај стана првиот папа од САД и засега по суштината малку се разликува од својот аргентински претходник. Од изборот досега именувал само неколку лица на високи ватикански функции, што често се смета за индикатор за папските приоритети.
Лав сѐ уште не се преселил во Апостолската палата, која и Франциск ја избегнуваше, а долго планираната јубилејна година на Католичката црква зазема голем дел од неговата агенда.
На меѓународната сцена досега оствари само една странска посета – на Турција и Либан, веќе договорена за време на понтификатот на Франциск. Но токму тоа патување ги истакна разликите во стилот: папата Лав говореше емотивно, но без еуфорија, се држеше до подготвените говори и воздржано ги поздравуваше верниците.
Папата Лав ја обнови старата традиција на неделен ден за одмор, вторник, во Кастел Гандолфо, папската летна резиденција во близина на Рим, која Франциск главно ја избегнуваше. Таму, како што вели, игра тенис, плива, чита и води телефонски разговори.
„Секој треба да има активност за да се грижи за себе, за телото и душата“, изјави 70-годишниот папа минатиот месец. Пред враќањето во Ватикан често одговара и на новинарски прашања, нов начин на комуникација со медиумите.
За разлика од Франциск, кој за време на понтификатот даде бројни ексклузивни интервјуа, Лав XIV за седум месеци дал само едно. Во последните недели, пак, беше отворено критичен кон американскиот претседател Доналд Трамп, оценувајќи дека односот кон мигрантите во САД претставува „крајно непочитување“.
„Тој не се двоуми да одговара на прашања. Го кажува она што го мисли затоа што е сигурен во своите идеи и во својот начин на управување“, истакна Реголи.
Пораката на папата допира до широка публика и благодарение на неговата повеќејазичност. Англискиот му е мајчин јазик, течно зборува италијански и шпански јазик што совршено го владее по две децении мисионерска работа во Перу.
Во ватиканските кругови постои задоволство од неговото поголемо почитување на институциите и методичниот стил на управување. Лав донесе и одлуки со кои делумно ги повлече некои управувачки реформи на својот претходник, како и враќање на поголема формалност во папското облекување повторно носи црвени плаштови.
Единствената новина во традицијата е паметниот часовник на неговата рака, кој понекогаш се забележува под чипкастиот ракав на белата папска облека.
Извор: Index.hr
