Со Cellforce, Porsche и матичната компанија Volkswagen (VW) имаа амбиција да направат голем пробив на пазарот на електромобилноста.
Меѓутоа, како што пишува Spiegel, плановите целосно се урнаа: од вкупно 286 вработени, околу 200 ќе останат без работа. За разлика од Porsche, во оваа подружница не постои гаранција за зачувување на работните места.
Загуби и последици
Оваа одлука претставува сериозен финансиски удар. VW вложи неколку милијарди евра во Cellforce, очекувајќи токму оваа фирма да донесе технолошки иновации со кои концернот ќе ја стигне конкуренцијата во производството на електрични автомобили.
Сега се отвора уште еден проблем – Cellforce доби милионска поддршка од покраината Баден-Виртемберг, а по гаснењето на проектот, овие средства би можеле да бидат побарани назад.
Porsche уште во април најави дека нема да продолжи со Cellforce и се обидуваше да најде нови инвеститори. Се спомнуваше и интерес од BMW, но договор не беше постигнат. Единствена надеж е дека мал дел од истражувачкиот тим би можел да биде задржан.
VW и Porsche во сè подлабока криза
Volkswagen веќе подолго време се соочува со сериозни проблеми, а Porsche кон крајот на јули објави значаен пад на профитот. Покрај бавниот премин кон електрични мотори, дополнителен удар дојде и од САД – новите царини ја влошуваат деловната состојба, пренесува Telegraf Biznis повикувајќи се на Fenix Magazin.
