Посетителите ќе имаат можност да уживаат во читање на делови од сликовницата, да се дружат и да учествуваат во креативни активности. На овој настан ќе биде создадена можност децата и родителите заедно да влезат во волшебниот свет на малата Софија, која низ своите приказни се впушта во авантури со својот розов авион.
„Приказни за мали авантуристи: Волшебните патувања на Софија“ е збирка од меѓусебно поврзани раскази наменети за деца од раноучилишна возраст, но погодни и за предучилишни деца како читање пред спиење. Во секоја приказна, Софија започнува нова магична авантура, овозможувајќи им на децата да ја истражат својата фантазија преку приказните.
Но, оваа сликовница е многу повеќе од обична книга за деца. Авторката Екатерина Ширгоска Лена со исклучителна вештина вметнува совети за родителите, пренесувајќи мудри насоки за воспитување и комуникација со децата, дури и за некои од потешките теми. На овој начин, книгата функционира и како своевиден прирачник за родителите, претворајќи ја во драгоцен извор на совети и инспирација.
Настанот е идеална можност за родителите и децата да се запознаат со ова прекрасно дело и да учествуваат во креативни активности што ќе го збогатат нивното искуство.
