На 25 декември со почеток во 19:30 часот во Лабараториум ќе биде промовирана книгата „Ретки птици“ на публицистот и музички новинар Ненад Георгиевски.
„Ретки Птици“ е книга што изобилува со длабоки размислувања и гледишта од истакнати уметници и мислители кои ја збогатуваат македонската и светската културна сцена. Книгата е организирана во два дела насловени „Мелодии“ и „Зборови, слики и патувања“, и во првиот дел содржи интервјуа со познати музички имиња како Рај Кудер, Збигњев Прајснер, Влатко Стефановски, Стив Ваи, Тереза Салгеиро, Бранко Николов (Фолтин), Џон Апелгрен и многу други. Посебно место во книгата зазема интервјуто со семејството на Жан Мишел Баскијат за изложбата „King Pleasure“, одржана во Њујорк во 2022 година.
Настанот ќе биде збогатен со настап на џез гитаристот и професор Сашо Поповски. Промотори на книгата се Александра Јуруковска и Милан Дамјаноски.
