На 6 септември во 8 часот, во „Култ“ во Охрид ќе се одржи промоцијата на книгата Rock ’n’ Beat од Михајло Грбевски е еден од најреномираните и најценетите музички новинари и уредници во историјата на македонското новинарство. Зад него се бројни интервјуа, рецензии, статии кои покриваат огромен дел од она што се нарекува современа култура во Македонија, и тоа во еден од најактивните и најплодни периоди за културата во поновата историја на државата.
Книгата Rock N’Beat претставува една богата колекција на музички интервјуа со интересни и живописни соговорници кои доаѓаат од различни поднебја, како од Македонија така и од регионот, но и од странство. Таа претставува еден крстопат или зборно место на луѓе кои активно твореле во музиката и кои настапувале во Македонија во изминатите 20 години.
Како новинар во неделникот „Екран”, како и во едни од најтиражните и најчитани дневни весници „Време” и „Нова Македонија”, ја имал таа можност да известува за бројни настани, а со тоа и да сретнува и да интервјуира луѓе кои директно или индиректно влијаеле врз музичките вкусови во Македонија, влијаеле врз културните политики и насоките во кои се движела музичката историја во државава.
Поделена во четири поглавја книгата дава увид во некои од најблескавите моменти во кариерите на домашни уметници, како Кирил Џајковски, Влатко Стефановски, Горан Трајковски, Горазд Чаповски, „Суперхикс”, „Д’Далтонс”, „Бла Бла Бла”… Книгата има и регионален домет со уметници од Србија , Хрватска и Словенија, како Душан Којиќ-Која (Дисциплина Кичме), Зоран Предин (Лачни Франц), Миле Кекин (Хладно Пиво). Конечно, книгата има и светски домен со интервјуа со уметници кои настапувале во Македонија низ годините во организација на најреномираните концертни агенции: Џони Ротен (Секс Пистолс), Јан Гилан (Дип Парпл), Дејвид Ковердејл (Вајтснејк), Били Гибонс (ZZ Top), Пол Ветер, Ал ди Меола и многу други.
Овие интервјуа даваат пресек на една импознатна новинарска кариера и даваат приказ на достигнувањата во македонското музичко новинарство. Самите интервјуа покажуваат зошто е тоа така – тие се содржајни, зрели, информативни и едукативни. Самите содржини се длабоки и широки но се приемчиви и интересни за читање, како музиката и професионалците така и за оние кои допрва почнуваат да чекорат по овој пат. Rock N’Beat е книга која даде многу одговори на прашањата за македонската музичка историја – каде сме биле, каде сме сега и каде сме се упатиле – вели во предговорот Ненад Георгиевски, музички новинар
