Во 2025 година, производството на млеко во Европската унија се предвидува да опаѓа поради неколку фактори, вклучувајќи го и намалениот број на крави, еколошките регулативи, ниските приходи на фармерите и појавата на болести.
Според извештајот на Глобалната земјоделска информативна мрежа (GAIN), под американското Министерство за земјоделство (USDA), помалото производство делумно ќе биде компензирано со намалената потрошувачка на свежо млеко, а како резултат на тоа, потрошувачката во индустријата исто така ќе се намали.
И покрај ова, производството на сирење останува главниот фокус на преработувачката индустрија на ЕУ, благодарение на солидната домашна потрошувачка и континуираната побарувачка на меѓународните пазари.
Производството на сирење се предвидува да расте во 2025 година, додека производството на путер и млеко во прав ќе се намали.
Според прогнозите, вкупните испораки на млеко во ЕУ ќе изнесуваат 149,4 милиони тони, што е за 0,2 отсто помалку од ревидираните проценки за 2024 година, пишува Dairyglobal.
Бројот на молзни крави се очекува годинава да продолжи да опаѓа, што нема целосно да се компензира со зголемена продуктивност. Потрошувачката на млеко во Хрватска исто така се намалува, со проектиран пад од 0,3 отсто на 23,5 милиони тони во 2025 година.
Иако ЕУ се соочува со намалена достапност на млеко, се предвидува дека производството на сирење ќе порасне за 0,6 отсто во 2025 година, достигнувајќи 10,8 милиони тони. Се чини, велат, производството на сирење ќе остане клучно за европската млечна индустрија.
Зголемувањето на производството на сирење, исто така, беше поттикнато од зголемените приходи и закрепнувањето на секторите за угостителство и туризам.
Млечната индустрија на ЕУ се соочува со предизвици поради спроведувањето на новата Заедничка земјоделска политика (ЗЗП) и Зелениот договор.
Многу земјоделци се загрижени за еколошките прописи кои, според нив, негативно влијаат на профитабилноста на ова производство.
Стратегијата на ЗЗП за периодот 2023-2027 година ќе биде клучна за иднината на европската млечна индустрија. Земјите како Германија, Франција, Полска, Холандија, Италија и Ирска, кои сочинуваат речиси 70 отсто од производството на млеко во ЕУ, ќе бидат од особен интерес, бидејќи нивните политики ќе ја обликуваат иднината на овој сектор.
