Најновите долгорочни прогнози за пролетта 2026 година укажуваат дека слабеењето на климатскиот феномен Ла Ниња може да влијае врз временските услови во Европа. Според анализата на Severe Weather Europe, се очекува тенденција на понизок воздушен притисок над континентот и повисок притисок над далечниот север.
Метеоролошката пролет ги опфаќа март, април и мај и претставува преоден период меѓу зимата и летото. Во стратосферата во моментов започнува настан на нагло затоплување, што може да има влијание врз времето кон крајот на февруари и во март.
Стратосферското затоплување претставува нагол пораст на температурата и притисокот на височина од околу 30 километри, што може да го наруши поларниот вртлог. Според прогнозите, температурите во стратосферата може да бидат и до 40 Целзиусови степени над нормалата. Се очекува овој настан да придонесе за формирање област на висок притисок над Гренланд, со можност за зона на понизок притисок над западна и централна Европа.
Таквиот распоред може да донесе понестабилно време, со температури под просекот во западните, централните и северните делови на Европа и повеќе врнежи во западна, централна и јужна Европа.
Во подолгорочен период, прогнозите укажуваат на слабеење на Ла Ниња – фаза на пониски температури на површината на Тихиот Океан. Анализите покажуваат дека студените аномалии постепено се повлекуваат, а во источниот дел од регионот веќе се забележуваат потопли аномалии.
Според моделите, можно е завршување на Ла Ниња и премин кон нова фаза на Ел Нињо до летото. Историските податоци од слични години покажуваат тенденција на понизок притисок над Европа во пролетниот период, со повисок притисок на север.
Прогнозата на европскиот модел ECMWF за март, април и мај предвидува област на висок притисок над северниот Атлантик и југоисточна Европа. Над западна и централна Европа би се задржала тенденција на понизок притисок. Температурната прогноза укажува на потопло време кон југоистокот на континентот, додека во западните, северните и северно-централните делови се очекуваат нормални до пониски температури од просекот.
Во однос на врнежите, се предвидува повлажна пролет во голем дел од Европа. Комбинираната прогноза на ECMWF и британскиот модел UKMO за март покажува помалку снег од просекот. Сепак, за април се посочува можност за нормални до надпросечни количини снег во северно-централна Европа, како и кон север и исток, што се поврзува со потенцијално поизразено подрачје на понизок притисок во централниот дел на континентот.
Долгорочните прогнози може да се менуваат со приближувањето на сезоната. Дополнителни ажурирања од европските и националните метеоролошки служби се очекуваат во текот на наредните недели.
