Кралската шведска академија на науките одлучи Наградата на Шведската банка за економски науки во спомен на Алфред Нобел за 2025 година да им ја додели на Џоел Мокир, Филип Агион и Питер Хаут, „за објаснување на економскиот раст заснован на иновациите“.
Една половина од наградата припадна на Џоел Мокир „за идентификување на предусловите за одржлив раст преку технолошки напредок“, а другата половина заеднички на Филип Агион и Питер Хаут „за теоријата на одржлив раст преку креативно уништување“.
Мокир користеше историски извори за да открие причините кои довеле до тоа одржливиот раст да стане нова нормала, додека Агион и Хаут ги проучуваа механизмите зад континуираниот раст. Во нивната студија од 1992 година конструираа математички модел на она што го нарекуваме креативно уништување – процес во кој нови и подобри производи влегуваат на пазарот, додека компаниите што продаваат застарени производи губат битка.
Со ова беа прогласени и последните Нобелови лауреати за оваа сезона.
Минатогодишното признание му припадна на тројца економисти – Дарон Асемоглу, Сајмон Џонсон и Џејмс А. Робинсон – кои проучуваа зошто некои земји се богати, а други сиромашни и покажаа дека слободните, отворени општества имаат поголеми шанси за напредок.
Наградата за економија официјално се вика „Награда на Шведската банка за економски науки во спомен на Алфред Нобел“. Ја основа Централната банка на Шведска во 1968 година, во чест на шведскиот претприемач и хемичар од 19 век кој го изумил динамитот и основал пет оригинални Нобелови награди.
Од тогаш е доделена 56 пати, со вкупно 96 лауреати. Само три добитнички биле жени.
Нобеловиот институт истражува можни истекувања на информации за Наградата за мир.
Нобеловите пуристи често нагласуваат дека наградата за економија технички не е „вистинска“ Нобелова награда, но како и останатите, се доделува на 10 декември, на годишнината од смртта на Нобел во 1896 година.
Минатата недела беа објавени добитниците на Нобеловите награди за медицина, физика, хемија, литература и мир.
