Тензиите на Блискиот Исток продолжуваат да ескалираат откако Иран испрати нов бран проектили кон Израел, додека во неколку земји во регионот беа активирани безбедносни предупредувања.
Според израелската војска, од Иран биле детектирани повеќе ракети насочени кон Израел, а противракетните системи започнале со нивно пресретнување.
Израелските медиуми јавуваат дека најмалку пет проектили биле пресретнати на небото над Тел Авив.
Заповедништвото за цивилна заштита претходно испрати итно предупредување до жителите на погодените области, барајќи од нив да се засолнат во заштитени простории додека трае пресретнувањето на ракетите.
По одредено време, израелската армија соопшти дека граѓаните можат да ги напуштат засолништата, но им препорача да останат во нивна близина.
Израелската служба за итна медицинска помош „Маген Давид Адом“ информираше дека засега нема пријави за повредени лица по ракетните напади.
Во меѓувреме, жителите на Дубаи добиле предупредување на мобилните телефони од Министерството за внатрешни работи на Обединетите Арапски Емирати, во кое се повикуваат веднаш да побараат засолниште поради можни ракетни закани.
Во пораката се наведува граѓаните да се оддалечат од прозорци, врати и отворени простори и да се засолнат во најблиската безбедна зграда.
