Следниот понеделник во Бруталиск ќе се одржи промоција на најновото електронско издание на БузАр – книгата со 50 необјавени мелограми од доајенот на македонската етномузикологија Живко Фирфов по повод 23 годишнината на архивот Buzarovski Archive
На промоцијата ќе говорат учесниците во најновите проекти на БузАр: Димитрије Бужаровски, Трена Јорданоска и Александар Димитријевски, а ќе бидат прикажани и 4 видеа од продукцијата на архивот. Во првото е разлистана најново издадената книга, второто содржи повеќе искажувања на Живко Фирфов за неговиот живот и дејност снимени во 1970тите, во третото е направен колаж од Мултимедијалниот корпус на македонски народни песни кој редовно се објавува на БузАр, и во последното видео по краткото искажување на Живко Фирфов како е настаната неговата Хумореска, ова дело е претставено преку изведбата на Хорот на ФМУ Скопје под диригентската палка на Ивица Зориќ во 2004 година (исто така снимено во ИРАМ/БузАр).
Настанот ќе се одржи во КЦ Бруталиск во понеделник, 4 септември, со почетокот во 20 часот.
