Ураганот Мелиса драматично се засили во текот на викендот и сега е ретка бура од највисока, петта категорија, со ветрови кои достигнуваат 260 километри на час.
Според Националниот центар за урагани (NHC), ова би можел да биде најсилниот ураган што некогаш го погодил островот Јамајка, каде ударот се очекува во вторник наутро.
Сега, центарот на бурата се наоѓа околу 210 километри јужно од Кингстон, и се движи многу бавно – само со 5 км/ч, што го зголемува ризикот од долготрајни и разорни последици.
„Не излегувајте од засолниште“ – предупредува Националниот центар
„Очекувајте катастрофални и по живот опасни поплави и свлечишта. Разорни ветрови ќе предизвикаат огромна штета на инфраструктурата, долготрајни прекини на струја и комуникации“, соопшти NHC.
Условите на тропска бура веќе се чувствуваат на Јамајка, додека се очекува полниот удар на ураганот Мелиса вечерва и утре наутро, јавува CNN.
Масовна евакуација и вонредна состојба
Владата на Јамајка издаде обавезни наредби за евакуација за неколку крајбрежни заедници, вклучувајќи делови од Кингстон.
Министерот за здравство, Кристофер Тафтон, изјави дека сите државни болници работат во „итен режим“, со прекинати планирани операции за ослободување болнички кревети.
Се отвораат прифатни центри низ целата земја, а министерот за локална самоуправа, Дезмонд Мекензи, предупреди дека „ниеден дел од земјата нема да биде поштеден од налетот на ураганот“.
Обилни дождови и разорни ветрови
Според метеоролозите, најсилните ветрови и дождови ќе го погодуваат островот од понеделник вечер до вторник утро.
На поизложените планински подрачја ударите може да бидат и до 30% посилни. На Јамајка и делови од Хаити и Доминиканската Република се очекуваат до 750 мм дожд, локално и до 1000 мм. Во источна Куба – до 500 мм врнежи. Брановите долж јужниот брег може да достигнат висина од 4 метри.
Голема закана за регионот
Освен Јамајка, Куба, Хаити, Доминиканската Република, Бахамите и островите Теркс и Каикос се под предупредување за ураган или тропска бура.
Поради бавниот движење на ураганот, се очекува долготрајна изложеност на силен ветер и обилни дождови, што би можело да предизвика масовни поплави и свлечишта.
Премиерот Холнес: „Време е да се заштитите“
Премиерот Ендрју Холнес им се обрати на граѓаните со предупредување:
„Сега е моментот да го обезбедите вашиот дом. Проверете го покривот и прозорците, поставете вреќи со песок и отстранете ги гранките што можат да предизвикаат штета. Ако живеете во поплавно подрачје – подгответе план за евакуација.“
Првите последици
Веќе се пријавени поплави и свлечишта на Хаити и Доминиканската Република, каде што загинале најмалку четири лица, а над илјада се евакуирани.
Во Кингстон, работници расчистуваат канали и одводи за да се спречат поплави, но властите стравуваат дека каналите нема да го издржат налетот на бурата ако се истури цела месечна количина дожд во само неколку час
Иако копното на САД не е директно загрозено, метеоролозите предупредуваат дека опасни морски струи и високи бранови би можеле да го погодат источниот брег на земјата во текот на следната недела.
