Емисиите на загадувачи од превозот и воздушниот сообраќај растат и претставуваат зголемен ризик за здравјето на луѓето, особено за луѓето што живеат во близина на пристаништата и аеродромите, според најновиот извештај на Европската агенција за животна средина (ЕЕА) „Квалитет на воздухот околу пристаништата и аеродромите“.
Извештајот повикува на подобрено следење на квалитетот на воздухот околу и во рамките на овие клучни сообраќајни центри.
Се проценува дека поморскиот транспорт ќе стане главен извор на загадување на воздухот од сообраќајот во крајбрежните градови до 2030 година, според документ на ЕЕА што ја анализира мрежата за следење и нивоата на загадување на воздухот во клучните пристаништа и аеродроми низ Европа.
Студијата ја поддржува ревидираната Директива на ЕУ за квалитет на амбиентниот воздух, која ги идентификува пристаништата и аеродромите како потенцијални жаришта на загадување на воздухот, каде што може да биде потребен дополнителен мониторинг за подобро да се процени влијанието на овие извори на загадување. Извештајот ги разгледува и проценува мрежите за следење и нивоата на загадување на воздухот во и околу главните пристаништа и аеродроми во 18 европски земји, со фокус на фините честички (PM2.5) и азот диоксидот (NO₂).
Црни точки на загадувањето на воздухот
Емисиите на азотни оксиди од поморскиот сообраќај се зголемуваат, а придонесот на овој сектор во вкупните емисии на азотни оксиди и честички од сообраќајот станува сè позначаен во споредба со другите. Исто така, емисиите од воздушниот сообраќај со децении се зголемуваат, како за азотните оксиди, така и за честичките.
Ревидираната Директива на ЕУ за квалитет на амбиентниот воздух воведува ажурирани и нови стандарди што треба да се постигнат до 2030 година, усогласувајќи ги со препораките на Светската здравствена организација.
Дефинирани се „жешки точки за квалитетот на воздухот“ тоа се области со особено високи нивоа на загадување кои бараат насочено следење, кои вклучуваат и локации како што се пристаништата и аеродромите.
Извештајот го анализираше бројот и локацијата на станиците за следење на квалитетот на воздухот во близина на пристаништата и аеродромите.
Наодите покажуваат дека тековното следење околу некои од овие сообраќајни центри е ограничено (во однос на бројот и распоредот на мерните точки) и не го одразува целосно нивното влијание.
Ниво на квалитет на воздухот околу пристаништата и аеродромите
Извештајот ги споредува нивоата на загадувачи во пристаништата и аеродромите со оние во околните региони.
Нивоата на азот диоксид беа повисоки отколку во околните области, а во некои случаи (во пристаништата Пиреја и Неапол и на аеродромот Милано-Линате) беа над ревидираната годишна гранична вредност на ЕУ предвидена за 2030 година. Во половина од пристаништата, концентрациите на NO₂ беа повеќе од двојно поголеми во споредба со околните региони.
Влијанието врз PM2.5 е посложено и помалку директно поврзано исклучиво со емисиите од пристаништата или аеродромите, бидејќи околните области исто така покажаа високи нивоа, а значителен број пристаништа и аеродроми беа над ревидираната гранична вредност на ЕУ предвидена за 2030 година.
Загадувањето на воздухот останува најголем ризик по животната средина и здравјето
Загадувањето на воздухот претставува најголем ризик по животната средина и здравјето во Европа и има бројни негативни последици по здравјето на луѓето. Ситните честички и азот диоксидот се меѓу главните загадувачи во оваа смисла.
Затоа, следењето на квалитетот на воздухот околу пристаништата, аеродромите и блиските градови е исклучително важно во наредните децении.
