Принцот Ендру, помладиот брат на Крал Чарлс III, беше пуштен од притвор во четвртокот вечерта, по околу 12 часа задржување. Тој беше приведен поради сомнеж за злоупотреба на положба додека извршувал јавна функција и наводи дека испраќал доверливи владини документи до Џефри Епстин.
Ендру Маунтбатен-Виндзор, кој наполни 66 години истиот ден, беше приведен во 8 часот наутро во Сандрингем. Полицијата претходно соопшти дека истражува тврдења според кои, додека бил британски трговски пратеник во периодот од 2001 до 2011 година, наводно споделувал чувствителни информации со Епстин.
Полицијата изврши претреси на имотите во Виндзор и Вуд Фарм на приватниот имот во Сандрингем во Норфолк, каде што престојувал Ендру. Според соопштението, претресите во Норфолк се завршени, додека тие во Royal Lodge на имотот Виндзор продолжуваат.
Ендру ја напуштил полициската станица во Ајлшам околу 19 часот. Тој и претходно негираше каква било незаконитост поврзана со Епстин. Неговото приведување е оценето како без преседан во модерната британска историја, бидејќи станува збор за повисок член на кралското семејство.
Според адвокатот Ендру Гилмор од канцеларијата „Grosvenor Law“, следниот чекор е полицијата да ги анализира запленетите документи и уреди. По обработката на материјалите, ќе биде составен извештај со проценка на доказите, кој ќе биде доставен до Крунското обвинителство. Таму ќе се донесе одлука дали ќе биде покренато обвинение. Процесот, зависно од обемот на доказите, може да трае од шест месеци до една година.
Од кабинетот на принцот не одговориле на барањата за коментар, а тој јавно не се огласил по приведувањето.
Полицијата ја продолжува истрагата и анализата на прибраните материјали. Одлуката за евентуално обвинение ќе ја донесе Крунското обвинителство по разгледување на доказите.
