Пет лица загинаа, а 18 беа повредени денеска во израелските воздушни напади во Хан Јунис, на југот на Појасот Газа, објавија локалните здравствени власти под контрола на Хамас. Ова се случува по обвинувањата од двете страни за кршење на сѐ покревкото примирје, кое трае речиси шест недели.
Според болничките извори, во еден напад врз куќа во градот Бани Сујела, источно од Хан Јунис, загинаа тројца, меѓу кои и бебе, а 15 лица беа повредени. Во блискиот град Абасан, еден маж беше убиен, а тројца повредени. Израелската војска потврди дека биле изведени напади, но тврдеше дека нема информации за жртви. Подоцна, болнички службеници известија дека уште еден Палестинец загинал во израелската артилерија во Абасан.
Израел: Отворивме оган по нападите на Палестинците
Израел соопшти дека ги гаѓал целите низ крајбрежната енклава откако припадници на палестинската милитантна група отвориле оган врз неговите војници. Болнички извори во Газа известија дека најмалку 25 лица загинале, што е најголем број од 29 октомври, кога загинале најмалку 100 лица.
Хамас ги нарече нападите „опасна ескалација“ и повика арапски посредници, Турција и САД, кои посредуваа во договорот за прекин на огнот, да интервенираат. Портпаролот на Хамас, Хазем Касем, обвини дека Израел ја поместил границата што го одредува кој дел од територијата ќе остане под контрола на Израел, што би било кршење на договорените линии.
Локални жители за Ројтерс изјавија дека во предградието Шеджаја на истокот од Газа забележале поместување на жолтите барикади, кои го означуваат израелското подрачје, за 100 метри на запад. Израел засега нема коментар.
Примирјето донесе смиреност, но нападите продолжуваат
Во Зејтун, исто така предградије на Газа, каде што во среда загинаа најмалку 10 лица во зграда каде беа сместени раселени семејства, Палестинците пребаруваа низ рушевините за да спасат лични предмети, додека спасувачите продолжија да бараат жртви.
„Тие велат дека има примирје, но јас се сомневам. Секој ден велат дека има примирје, тоа е сосема неточно“, рече жителот Акрам Исваир. „Ракетите ги погодија раселените, несреќните жители. Што можеме да направиме ние, нашите жени и семејства?“
Договорот за прекин на огнот од 10 октомври го смири двегодишниот конфликт во енклавата, што им овозможи на стотици илјади Палестинци да се вратат во разурнатиот град Газа. Израел ги повлече војниците од градот, а се зголеми и протокот на хуманитарна помош.
Жртви од двете страни
Сепак, насилството не е целосно запрено. Хамас се обидува да ја врати својата власт, а некои се загрижени и за де факто поделбата на територијата. Условите за живот се многу лоши. Палестинските здравствени власти тврдат дека израелските сили убиле 312 лица од почетокот на примирјето, додека Израел соопштува дека тројца негови војници загинале.
Конфликтот во Газа започна по нападот на милитантите предводени од Хамас, кои на 7 октомври 2023 убија 1.200 луѓе, главно цивили, и киднапираа 251 заложник на југот на Израел. Во последователната израелска офанзива, според здравствените власти во енклавата, загинале повеќе од 69.000 Палестинци, главно цивили.
Договорот за примирје вклучуваше ослободување на сите 20 живи заложници од страна на Хамас во Газа во замена за околу 2.000 Палестинци во израелските затвори. Хамас се согласи и да предаде посмртните останки на 28 заложници во замена за телата на 360 палестински милитанти. Израел врати 330 тела на Палестинците.
