Документарниот филм „Приказната за Силјан“, откупен за глобална дистрибуција од National Geographic Documentary Films, продолжува да го зацврстува меѓународниот успех со ново врвно признание. Филмот, во режија и продукција на Тамара Котевска и Жан Дакар (Jean Dakar), е номиниран за престижните PGA Awards (Producers Guild of America) во категоријата Outstanding Producer of Documentary Motion Pictures која претставува една од највисоките награди во документарниот свет.
Номинација што ја вреднува авторската издржливост
PGA наградите имаат особен углед затоа што го препознаваат трудот на автори кои во документарната продукција често носат повеќе улоги истовремено: режисери, продуценти, сниматели, истражувачи и теренски координатори. Ваквата номинација е потврда за севкупната пожртвуваност, креативност и издржливост кои стојат зад филмот.
Последните два месеца, преку светските премиери и Q&A сесии, уште појасно се откри процесот зад создавањето на „Приказната за Силјан“. Филмот е резултат на три години снимање во екстремни услови: живот на терен, ноќевање во прилагодено комбе, денови и ноќи поминати со протагонистите, долги набљудувања на штрковите и нивните миграции, како и работа без формален буџет или класична продукциска инфраструктура.
Производствената храброст и упорност на Котевска и Дакар, кои го носеа филмот од идеја до завршница, PGA ги препозна како пример за „total filmmaking“, каде што авторската визија, продукциската организација и физичката работа се спојуваат во едно.
„Оваа номинација можат да ја разберат само оние што го живеат филмот“
Во заедничката изјава, Котевска и Дакар велат: „Ова признание е за сите денови, ноќи, жртви и години посветени на оваа приказна, за животот на терен, за довербата што ни ја дадоа протагонистите и за миговите кога камерата престана да биде камера и стана дел од светот што го снимавме.“
Камера што исчезнува во приказната
Процесот на снимање не бил само технички, туку и длабоко човечки. Со месеци поминати со протагонистите и нивната ретка врска со белите штркови, камерата постепено станала незабележлива. И луѓето и птиците природно го прифатиле нејзиното присуство. Токму овој ненаметлив, емпатичен пристап е визуелниот потпис по кој Котевска и Дакар се препознаваат во светот на документарниот филм.
Меѓународна наградна приказна што продолжува
„Приказната за Силјан“ веќе се вброи меѓу најрелевантните документарни остварувања на годината. Филмот освои две награди на IDA Documentary Awards – за најдобар документарен филм и најдобра камера, а го имаше своето претставување и на водечките фестивали во Венеција и Торонто. Проекциите низ САД, Канада и наскоро Велика Британија дополнително го зајакнаа неговото меѓународно присуство.
Фактот што National Geographic Documentary Films го откупи филмот не само што го отвора патот кон глобална публика, туку и дава силен поддржувачки импулс во тековната Оскарска кампања.
PGA – водечки индикатор за Оскарите
PGA Awards се меѓу најсилните индикатори во трката за Оскар. Нивните номинирани филмови и добитници редовно се појавуваат и во финалниот избор на Академијата. Со оваа номинација, „Приказната за Силјан“ ја зацврстува својата позиција како еден од најсериозните документарни претенденти на светската сцена.
