Филмот триумфираше како најдобар долгометражен документарец според изборот на публиката, награда која фестивалската сцена традиционално ја смета за едно од најискрените и највредни признанија.
„Уште една награда за ‘Силјан’ во Калифорнија, за мене најважната – наградата на публиката за најдобар документарец!“ напиша Котевска во својата објава, придружувајќи ја пораката со визуел што ја означува победата на филмот за 2025 година и ја потврдува силната емотивна врска што делото ја создава со гледачите.
„Приказната за Силјан“ е документарна бајка што црпи инспирација од македонскиот фолклор од 17 век. Преку приказната за земјоделецот Никола и неговата неочекувана, симболична врска со бел штрк со повредено крило, филмот отвора универзални мотиви за човечкиот опстанок, нежноста и надежта.
Делото продолжува да ја гради авторската препознатливост на Котевска – интимен, тивок и длабоко човечки пристап, во кој односот меѓу човекот, природата и моралниот избор е во фокусот.
По глобалниот успех и оскаровската номинација на „Медена земја“, овој филм ја зацврстува позицијата на Котевска како едно од најавтентичните имиња на современиот документарен филм.
Наградата од Coronado Island Film Festival претставува уште еден важен чекор во меѓународната промоција на филмот. Национал Географик ја најави американската премиера на 28 и 29 ноември во IFC Center во Њујорк, што му овозможува на „Приказната за Силјан“ силен продор на американската филмска сцена.
Годинава филмот веќе ги освои:
- „Наградата на Музата“ за најинспиративен филм на Биеналето во Венеција,
- овации на преполните проекции на фестивалот во Торонто,
- и статус на македонски кандидат за наградата „Оскар“ за најдобар интернационален филм.
Со новото признание, „Приказната за Силјан“ продолжува да го зацврстува својот меѓународен успех и да ја претставува македонската кинематографија на светската сцена.
