Американски борбени авиони биле подигнати за пресретнување на повеќе руски воени летала забележани во близина на Алјаска, соопшти Северноамериканска команда за воздушна одбрана (NORAD), пренесува CBS News.
Според НОРАД, во зоната за идентификација на противвоздушна одбрана на Алјаска (АДИЗ) биле откриени два руски бомбардера Ту-95, два борбени авиона Су-35 и еден авион за радарско извидување А-50.
Како одговор, биле подигнати два авиона Ф-16, два Ф-35 и четири танкер-авиони КЦ-135, кои ги следеле руските летала додека не ја напуштиле зоната на одбрана на Алјаска.
Од НОРАД нагласуваат дека руските авиони не влегле во суверениот воздушен простор на САД или Канада и дека ваквите активности во алјаската АДИЗ се сметаат за редовна појава што не претставува закана.
Зоната за идентификација на воздушна одбрана е дел од меѓународниот воздушен простор што започнува таму каде што завршува националниот воздушен простор на САД и Канада, а од сите летала се бара навремена идентификација од безбедносни причини.
Во септември 2025 година САД исто така пресретнаа руски авиони Ту-95 и Су-35 во истата зона. Во август истата година НОРАД четири пати во една недела пресретна руски извидувачки авион.
Во јули 2024 година американските сили пресретнаа руски и кинески бомбардери по нивното влегување во зоната за идентификација на Алјаска, што според американското Министерство за одбрана беше прв заеднички влез на руски и кинески авиони во таа зона.
Од НОРАД не најавија дополнителни мерки, посочувајќи дека ситуацијата е под контрола и дека ваквите активности се следат во рамки на редовните одбранбени процедури.
