Ова е приказна за човек што ја губи вербата, но и чин на освестување на надежта што тлее во нас, дури и кога таа изгледа недостапна.
Тоа е еден обид да се покаже дека дури и во рамнодушноста, апсурдот и распадот, постои простор за создавање, за сон што го отвора погледот, ги умножува значењата и ја открива смислата.
Сцената овде не е само простор за игра, туку лабораторија на перспективи. Прашањата што се отвораат не се сведени само на човекот во неговите мисли, соништа и дела, туку и на границите на она што сме способни да го видиме и да го замислиме.
Креативноста во оваа претстава не е привилегија само на уметникот. Таа е начин на живеење—принцип што го носиме сите.
Да бидеш креативен значи да гледаш подалеку, да ги поместуваш границите, да го прифатиш ризикот на непознатото, да бидеш и храбар и ранлив, дури и кога тоа бара, да бидеш глупав. Креативноста значи да создадеш можност таму каде што изгледа дека ја нема.
„Оваа претстава не нуди одговори; таа поставува прашања. Како го гледаме светот околу нас? Колку сме го ограничиле сопствениот поглед? И што ќе се случи ако си дозволиме да сонуваме? Во сонот на смешниот човек, светот останува ист, но е гледан низ нова визура. Тоа е суштината: не промена на светот, туку промена на начинот на кој го гледаме“, изјави за Трн, Дамјан Читкушев, режисер на монодрамата.
Светот не е совршен, но токму неговата несовршеност е извор на бескраен потенцијал. „Којзнае зошто” е повик да бидеме храбри— да препознаваме, да сонуваме, да создаваме.
Билетите за утрешната претстава се целосно распродадени.
