Четворица правни експерти на Обединетите нации во средата ја осудија американската поморска блокада на Венецуела, опишувајќи ја како незаконска вооружена агресија, и го повикаа Конгресот на САД да интервенира. Соединетите Американски Држави распоредија свои сили во Карипскиот регион и неодамна пресретнаа неколку нафтени танкери во рамки на поморската блокада на венецуелски пловила за кои сметаат дека се под санкции.
„Не постои право за наметнување еднострани санкции преку вооружена блокада“, соопштија експертите на ОН во заедничко соопштение. Тие додадоа дека блокадата претставува забранета употреба на воена сила против друга држава според Повелбата на ОН.
„Станува збор за толку сериозна примена на сила што таа е јасно препознаена и како незаконска вооружена агресија според дефиницијата за агресија на Генералното собрание од 1974 година“, наведоа тие.
Повик до Конгресот на САД за итна интервенција
„Како таква, таа претставува вооружен напад според членот 51 од Повелбата, што значи дека, во принцип, ѝ дава право на земјата-жртва на самоодбрана.“
Американскиот претседател Доналд Трамп ја обвинува Венецуела дека ја користи нафтата, главниот ресурс на јужноамериканската земја, за финансирање на „нарко-тероризам, трговија со луѓе, убиства и киднапирања“.
Каракас ги негира обвинувањата за вмешаност во трговијата со дрога и тврди дека Вашингтон сака да го собори претседателот Николас Мадуро со цел да ги преземе венецуелските нафтени резерви, кои се најголеми во светот.
Десетици напади и повеќе од 100 загинати
Американските сили од септември извршиле десетици воздушни напади врз бродови за кои Вашингтон тврди – без да презентира докази – дека превезувале дрога. Во тие напади загинале повеќе од 100 лица.
„Овие убиства претставуваат кршење на правото на живот. Тие мора да бидат истражени, а одговорните изведени пред лицето на правдата“, истакнаа експертите.
„Во меѓувреме, американскиот Конгрес треба да интервенира за да ги спречи понатамошните напади и да ја укине блокадата“, додадоа тие. Исто така ги повикаа и другите држави да преземат мерки за запирање на блокадата и на незаконските убиства, како и за изведување на сторителите пред правдата.
Кои се експертите што го потпишаа соопштението
Соопштението го потпишаа:
- Бен Сол, специјален известувач за заштита на човековите права во борбата против тероризмот
- Џорџ Катругалос, експерт за унапредување на демократски и праведен светски поредок
- Сурија Дева, експерт за право на развој
- Џина Ромеро, експертка за правото на слободно собирање и здружување
Станува збор за независни експерти кои работат по мандат на Советот на ОН за човекови права и не зборуваат во име на самите Обединети нации.
Венецуела во вторникот, по нејзино барање за итна седница на Советот за безбедност на ОН, во седиштето на ОН во Њујорк го обвини Вашингтон за „најголемата изнуда во нашата историја“.
