Прада СпА, во следните три години ќе биде целосно посветена на обновата на брендот Версаче и не планира никакви дополнителни аквизиции во тој период, изјави извршниот директор Андреа Гевара.
Договорот од 1,25 милијарди евра за купување на Версаче од Капри Холдингс Лтд, официјално ќе заврши на 2 декември, изјави Гевара на настан во Италија. Тоа е најголемата аквизиција во историјата на Прада, а нејзиниот директор нагласува дека ребрендирањето и интеграцијата на Версаче ќе бидат главна задача на компанијата во наредните години.
„Ништо не се подготвува“, изјави Гевара за новинарите во фабриката за кожа Прада во Скандичи, каде што беше одбележана 25-годишнината од Академијата Прада, програма за развој на млади кадри во модната индустрија.
„Ќе бидеме целосно посветени на Версаче некое време“, додаде тој.
На чело на пресвртот на брендот ќе биде Лоренцо Бертели, најстариот син на дизајнерката Миуча Прада и индустријалецот Патрицио Бертели. Тој ќе биде именуван за извршен претседател на Версаче, како што самиот претходно изјави за Блумберг.
Версаче ќе донесе сосема поинаква естетика во портфолиото на Прада и претставува важен чекор во создавањето посилен италијански луксузен конгломерат кој може поефикасно да се натпреварува со глобалните модни гиганти. Иако е далеку од славата што ја уживаше во 1980-тите и 1990-тите, брендот отвора можност за понатамошен раст на Прада, особено по огромниот успех на линијата Миу Миу, истакна Бертели.
Продажбата на Прада порасна во текот на првите девет месеци од годината благодарение на силната побарувачка за брендот Миу Миу, што го компензираше падот на продажбата на основната линија на Прада.
Гевара додаде дека амбицијата на компанијата е да продолжи да расте „побрзо од остатокот од индустријата“ и дека влијанието на американските царини „сега е зад нив“.
