Американската крајбрежна стража вчера, во близина на брегот на Венецуела, за првпат заплени санкциониран нафтен танкер, со што дополнително се заострија односите меѓу двете земји, пренесуваат американските медиуми.
Министерството за внатрешна безбедност на САД (DHS) објави видео-снимка подолга од седум минути на која се гледа упадот и заплената на танкерот M/T CENTURIES.
Станува збор за супертанкер за превоз на сурова нафта, кој плови под панамско знаме, е во кинеска сопственост и се наоѓа на американската листа на санкции. Акцијата ја спровела Крајбрежната стража на САД во меѓународни води во јужниот дел на Карипското Море, недалеку од брегот на Венецуела, преку својот Поморски специјален интервентен тим (MSRT), со поддршка од американската морнарица.
Трамп нареди целосна блокада на сите санкционирани танкери
Американскиот претседател Доналд Трамп во средата, преку објава на својата платформа Truth Social, нареди „целосна блокада на сите санкционирани нафтени танкери што доаѓаат во Венецуела и заминуваат од неа“.
Тој ја оправда одлуката со тврдењето дека таа јужноамериканска држава украла нафта, земјиште и друга имотна сопственост од САД, што, според него, мора да биде вратено.
Трамп го обвини режимот на венецуелскиот авторитарен лидер Николас Мадуро дека ја користи „нафтата од тие украдени нафтени полиња за финансирање на самите себе, нарко-тероризам, трговија со луѓе, убиства и киднапирања“.
Позадина на конфликтот
Во раните 2000-ти години, Венецуела ги национализираше нафтените полиња, што ги погоди странските, вклучително и американските компании, и доведе до спор околу исплата на обештетување. Во 2019 година, за време на својот прв мандат, Трамп воведе санкции против државната нафтена компанија PDVSA.
Само неколку дена пред објавата за блокадата, американската војска веќе презела контрола над еден нафтен танкер во близина на венецуелскиот брег.
Венецуела: Ова е сериозен чин на меѓународно пиратство
Владата на Венецуела остро ја осуди американската заплена на уште еден брод што превезувал нафта во близина на јужноамериканскиот брег, нарекувајќи ја „сериозен чин на меѓународно пиратство“.
„Венецуела ја осудува кражбата и киднапирањето на приватен брод што превезувал нафта, како и присилното задржување на екипажот од страна на припадници на вооружените сили на САД во меѓународни води“, се наведува во официјалното соопштение.
Од Каракас најавија дека за случајот ќе ги информираат Советот за безбедност на Обединетите нации, како и други мултилатерални организации и влади.
