Додека протестите и немирите во Иран влегуваат во критична фаза, прашањето за улогата на познатите и влијателни личности станува сè поцентрално – и за поддржувачите на протестите, и за самиот режим во Техеран. Во тој контекст, сè почесто се отвора дилемата дали протестното движење влегува во нова пресвртница и дали се бараат поинакви комуникациски стратегии, насочени кон создавање поголем јавен притисок и посилно влијание врз домашната и меѓународната јавност.
Историски гледано, познатите личности често имале значајна улога во оформувањето на наративите околу клучни политички одлуки и општествени пресврти. Нивното влијание не се манифестирало само преку нивната уметничка или јавна работа, туку и преку вршење индиректен јавен притисок – преку симболичка поддршка, медиумска видливост и легитимирање на одредени каузи пред пошироката јавност. Во вакви моменти, кога институционалните канали се затворени или контролирани, токму ваквиот тип на комуникација може да стане клучен инструмент во борбата за внимание, солидарност и промена.
Поддршка од светската сцена
Мадона како носечка поп-икона јавно изрази поддршка за иранските демонстранти преку објава на Инстаграм. Таа напиша дека, додека размислува за својот престој во Мароко за време на празниците, мисли на „сите луѓе во Иран кои се борат за очајно потребна револуција и се подготвени да умрат за она во што веруваат“.
Во пораката, Мадона посочи дека ограничувањето на слободите во Иран ја поттикнува да размислува за сопствениот живот и привилегиите што ги има. „Времето е сега. Издржете! Стојам со Иран. Нека се слушнат нивните гласови. СЛОБОДЕН ИРАН!“, напиша таа.
Техеран врши внатрешен притисок врз „влијателните личности“
Паралелно со меѓународната поддршка за протестите, режимот во Техеран јавно упати апел до „влијателните личности“ во земјата да „застанат на вистинската страна на историјата“. Повикот беше објавен во денешните весници, по неколкудневните немири и нивното насилно задушување, пренесе иранската новинска агенција Fars.
Во пораката што ја пренесува државната агенција, се цитира врховниот лидер Али Хамнеи, кој повикува јавните личности „без двоумење или молчење“ да истапат и да дадат „соодветен одговор“ на, како што се наведува, „дрската и бесрамна реторика на добро познатите непријатели на Иран“.
Во текстот се додава дека „нема место за неутралност или тишина, бидејќи самиот Иран е во прашање“.
Политичка алтернатива во егзил
Во меѓувреме, иранскиот престолонаследник во егзил Реза Пахлави одржува конференција за новинари во Вашингтон, на која отворено ја поддржува протестната динамика и се обидува да се позиционира како алтернатива на актуелниот режим во Техеран.
Пахлави, чиј татко беше соборен и протеран за време на Иранската револуција, во изминатиот период гласно застанува зад демонстрантите и настојува да добие меѓународна политичка видливост. На настанот присуствува и дописникот од САД, Џејмс Метјуз.
Битка за симболична моќ
Развојот на настаните покажува дека протестите во Иран не се водат само на улиците, туку и на симболично и комуникациско ниво. Поддршката од глобално препознатливи фигури, како и обидите на режимот да ја мобилизира домашната елита, укажуваат на тоа дека борбата за јавното мислење – дома и во светот – станува клучен фронт во оваа криза.
