Две лица загинаа, а 22 се повредени во пожар што избувнал во 2:15 часот по полноќ во петокот во работничкиот хостел „Спорт“ на улицата Жичи Петер во Будакеси, град западно од Будимпешта, објави унгарскиот „Дејли њуз“. Надлежните служби соопштија дека се сомневаат оти пожарот можеби бил предизвикан од експлозија на плинска боца.
Кога пожарникарските екипи пристигнале на местото, речиси 200 квадратни метри од двокатниот објект веќе биле зафатени од пламен, а огнот се проширил и на покривната конструкција. Покривот целосно изгорел, а објектот повеќепати повторно се запалувал и по почетокот на гаснењето, што ги отежнало спасувачките активности.
Пожарникарите евакуирале повеќе лица од објектот исполнет со чад, додека дел од сместените успеале сами да излезат. Околу 8 часот наутро, при пребарување на урнатините, биле пронајдени две тела. Надлежните предупредиле дека првично неколку лица биле пријавени како исчезнати и не ја исклучиле можноста за дополнителни жртви.
Градоначалничката на Будакеси, Отилија Ѓори, потврдила дека има загинати, откако службите за управување со кризи првично информирале само за повредени.
Активиран бил протокол за масовни несреќи. Националната служба за итна медицинска помош ангажирала повеќе од 40 медицински лица и 18 амбулантни возила. Според портпаролот Пал Ѓорфи, медицинска помош добиле 22 лица: четворица се со животозагрозувачки повреди, тројца се тешко повредени, а останатите имаат полесни повреди. Повредените биле пренесени во осум болници во Будимпешта.
Пожарникарите отстраниле дополнителни плински боци од објектот за да спречат нови експлозии. На терен интервенирале и полицијата, службите за јавна безбедност и доброволни пожарникари, а биле воведени и сообраќајни ограничувања во дел од улицата.
Општината обезбедила привремено сместување во општинската зграда за лицата кои останале без дом.
Во тек е истрага за утврдување на точната причина за пожарот и околностите под кои настанал.
