Во најновата ескалација на деценискиот територијален спор се користат борбени авиони, тенкови и дронови, а стотици илјади цивили бегаат кон привремени засолништа од двете страни на границата.
Стотици илјади во бегство
Во средата, евакуираните граѓани барале прибежиште во пагоди, училишта и други безбедни простории, бегајќи од судирите што се прошириле низ пет провинции во двете земји. Само во Тајланд засолниште побарале повеќе од 400.000 лица, додека во Камбоџа биле евакуирани над 101.000 луѓе, информира портпаролот на тајландското министерство за одбрана.
Патиштата се преполни со возила натоварени со луѓе и нивниот имот. „Властите велат дека повеќе не е безбедно“, изјави 30-годишната Сеут Соенг, одморајќи се крај патот со своето семејство. Нијам Пода, 62-годишна одгледувачка на шеќерна трска, побегнала од својот дом во провинцијата Са Каео, веќе вторпат во последните пет месеци.
„Морав да бегам што побрзо можев“, раскажува таа. „Се надевам дека ќе дојде мир, за да можам да се вратам на својата нива.“
Трамп најавува медијација
Разгорувањето на конфликтот го привлече вниманието и на САД. Американскиот претседател Доналд Трамп најави дека ќе се вклучи во решавањето на кризата, изјавувајќи дека во четврток ќе разговара со лидерите на двете земји.
„Мислам дека можам да ги натерам да престанат да се борат. Кој друг може тоа?“, изјави Трамп пред новинарите во Вашингтон.
САД, Кина и Малезија веќе посредуваа при обид за прекин на огнот во јули, но примирјето пропадна во ноември кога Тајланд го суспендираше договорот.
Меѓусебни обвинувања и нови воени дејства
Двете страни се обвинуваат меѓусебно за повторната ескалација. Камбоџанското министерство за одбрана го обвини Тајланд за неселективно гранатирање на цивилни подрачја и на храмот Та Крабеј, кој го опиша како „свето место на Камбоџа“. Според нив, загинале 10 цивили, меѓу кои и бебе.
Тајландската армија, пак, тврди дека камбоџанските сили испукале ракети кои паднале во близина на болницата Phanom Dong Rak во провинцијата Сурин. Поради безбедносни ризици, во делови од провинцијата Са Каео е воведен полициски час.
Корени на судирот и дипломатски реакции
Ова е најсмртоносната ескалација од јули наваму, а во коренот на конфликтот лежи длабок територијален спор околу 800-километарската граница од колонијалниот период. Борбите се интензивираа околу историски храмови на кои двете земји полагаат право.
Камбоџа најави повлекување од Игрите на Југоисточна Азија што се одржуваат во Тајланд, наведувајќи дека не може да гарантира безбедност.
Портпаролот на тајландското Министерство за надворешни работи изјави дека конфликтот „на крај ќе мора да се реши преку преговори“, но дека „моментално не е време за дијалог“.
„Доколку трета земја сака да посредува, Тајланд во оваа фаза не може да го прифати тоа, премината е линијата“, изјави тој. „Наши граждани се убиени и мора да воспоставиме доверба пред да започнат разговорите.“
Извор: Index.hr
