Ново истражување открива масовно незадоволство во Европа од новиот трговски договор со САД. Повеќето испитаници го опишуваат договорот како „понижување“ за Европската Унија и сметаат дека претседателката на Европската комисија, Урсула фон дер Лајен, треба да поднесе оставка.
Истражувањето, спроведено од француската агенција Cluster17 за Le Grand Continent, е направено меѓу 5.302 луѓе од најголемите пет членки на ЕУ: Германија, Франција, Италија, Шпанија и Полска, во периодот од 30 август до 4 септември.
Што содржи договорот?
Под договорот кој веќе стапи во сила, речиси сите производи од ЕУ што се извезуваат во САД се обложени со 15% царина, додека американските производи за ЕУ се ослободени од царински давачки.
Само мал број категории – како авиони, суровини и опрема за чипови – се дел од „нула-за-нула“ шема.
Европа не успеала да ги вклучи виното и алкохолните пијалаци – сектор со голема стратегиска важност – во безцаринскиот список.
Клучни резултати од анкетата:
- 52% од испитаниците го опишале договорот како „понижување“
- 77% сметаат дека договорот го фаворизира САД, само 2% велат дека е поволен за ЕУ
- 75% велат дека фон дер Лајен лошо ги бранеше интересите на Европа
- 60% сакаат таа да поднесе оставка
- 70% изјавиле дека се спремни да бојкотираат американски производи
- 76% се против финансиските обврски на ЕУ кон САД (750 милијарди $ за енергија, 600 милијарди $ инвестиции и 40 милијарди $ за чипови)
Политички импликации
Иако голем дел од луѓето се информирани за содржината на договорот (71%), фон дер Лајен се соочува со сè поголем политички притисок воочи својот говор за состојбата на Унијата.
Дури и во Полска, каде реакциите се послаби, 49% реагирале со рамнодушност, но не и со поддршка. Во Франција и Шпанија, бројките се највисоки – 65% и 56% реагираат со „понижување“.
Интересно е дека, и покрај сето ова, 70% од Европејците сè уште сакаат нивната земја да остане во ЕУ, за разлика од 24% кои би поддржале „ЕУ-излез“ сличен на Брегзит.
