Вчера се навршија точно два месеца од трагедијата која се случи кога се урна надстрешницата на Железничката станица во Нови Сад, при што загинаа 15 лица, меѓу кои и деца. На 1 ноември 2024 година, целата Србија остана без зборови. Две лица кои тогаш беа тешко повредени, се уште се во болница под постојан лекарски надзор. Почит на настраданите вчера беше оддадена со петнаесетминутен молк на местото на трагедијата.
Вчера, две месеци по трагичниот настан, жителите на Нови Сад се собраа на 11:52 часот пред Железничката станица, на повик на студентите.
Студентите и граѓаните се собраа пред Железничката станица, за да го одбележат овој ден. Почитта беше оддадена со 15-минутен молк, за време на кој беше блокиран сообраќајот на раскрсницата на Булеварот Јаше Томиќ и Булеварот Ослободувања.
Граѓаните палеа свеќи, а на собирот не се одржаа говори, ниту апели за натамошни собири.
Надстрешницата на реконструираната Железничка станица се урна на 1 ноември. Претставниците на властите во тој момент, додека не беше познат точниот број на жртви, тврдеа дека надстрешницата не била реконструирана. Потоа се покажа дека тоа било лажна информација.
Како што покажала вештачењето, новата конструкција беше додадена на надстрешницата, што ја направи 23,11 тона потешка од дозволеното оптеретување.
Во текот на предистражната постапка, испрашани се десетици лица, а по налог на обвинителството се уапсени поранешниот министер за градежништво Горан Весиќ и поранешните директори на „Инфраструктура железници Србија“ Јелена Танасковиќ и Небојша Шурлан, како и помошничката на Весиќ, Ана Димоски.
Весиќ беше пуштен на слобода по неколку дена, додека за Танасковиќ и Димоски беше определен куќен притвор.
На крајот од годината, Више јавно обвинителство во Нови Сад подигна обвинение против 13 лица, барајќи Весиќ, Танасковиќ и Димоски да бидат вратени во притвор. Меѓутоа, Вишиот суд го одбил тој предлог.
Падот на надстрешницата доведе до граѓански протести и студентски блокади низ целата земја, со барање за кривична одговорност за смртта на 15 лица. Под притисок на студентските блокади, властите ја објавија дел од документацијата во врска со реконструкцијата, која претходно ја криеја од јавноста. Истото го направи и обвинителството.
Од објавената документација се дозна дека се одговорни сите во ланецот на оние кои учествувале во реконструкцијата на станицата во Нови Сад, додека надзорот, практично, не постоел.
