Тешки облаци донесоа невидено силно невреме, кое во само еден час успеа да го претвори мирното крајбрежје во сцена налик на катастрофален филм.
Умаг и Новиград беа најтешко погодени. Улиците таму се претворија во реки, подрумите и приземните станови се најдоа под вода, а жителите беспомошно гледаа како надојдената вода го преплавува нивниот имот. Во некои делови на Новиград наврнаа и до 120 литри дожд на метар квадратен – и тоа за само неколку часа.
Невремето беше придружено со силна грмежлива активност. Речиси 2000 удари на гром беа забележани за помалку од два часа, а громовите ја сечаа темната атмосфера без најави за смирување.
На теренот, сцената беше хаотична. Пожарникарите од Умаг, но и екипи од Пореч, Ровињ и Бузет, работеа без пауза. Центарот за итни случаи 112 беше преплавен со повици – над 30 граѓани пријавиле поплави уште во текот на утрото.
Целосно беше затворен патот меѓу Бртонегла и Фиорин, откако надојдената вода го преплави коловозот и го направи непроминлив.
Метеоролозите велат дека се работи за т.н. “обилносен воз” – метеоролошки феномен кој се задржува над исто подрачје и истура огромни количини дожд за кратко време. Истиот феномен, велат, ја погоди Истра и пред неколку дена – и сега повторно предизвика потоп.
Во моментов, сите служби се на терен. Граѓаните се повикуваат на претпазливост, додека се чека стабилизација на временските услови.
Извор: Index.hr
