Царините се закануваат да го продолжат падот на побарувачката за чанти и луксузни часовници.
САД и Кина продолжија да ги зголемуваат увозните тарифи за производите едни на други во сè пожестокиот трговски спор што се заканува сериозно да ја поткопа довербата на потрошувачите во двете најголеми економии во светот.
Аналитичарите одговорија со намалување на прогнозите за раст на целата индустрија. Луксузниот сектор ќе претрпи пад на приходите од 2 проценти во 2025 година (ова е драстичен пад од претходната прогноза за раст од 5 проценти) поради зголемената економска неизвесност и зголемената можност за глобална рецесија.
Тие очекуваат органската продажба во основната дивизија за мода и кожни производи на LVMH да падне за еден процент во првиот квартал. Се очекува продажбата на групацијата да биде непроменета во споредба со истиот период минатата година.
Владее неизвесност.
Аналитичарот на Бернштајн, Лука Солка, се држеше до своите намалени проценки за секторот како целина во 2025 година, дури и откако Трамп објави 90-дневна пауза на неговите „реципрочни тарифи“ за земјите што покажаа подготвеност за повторно преговарање за трговските договори со САД.
„Враќањето на претходните бројки, како она што се случи да е само лош сон, е невозможно. Имаме материјална штета на финансиските пазари и во економијата како резултат на непредвидливите политички најави“, рече Солка.
„Владее неизвесност, што инаку е одлична позадина за рецесија“, додаде тој.
По историскиот бум за време на пандемијата, кога потрошувачите се расфрлаа со парите на скапи чанти и алкохол, луксузот доживеа пад бидејќи купувачите од средната класа почнуваат да ги ограничуваат трошењата, а кинеската економија се сопнува. Ситуацијата сега стана покомплицирана со трговската војна на Трамп.
Индустријата и губењето на довербата
Неуспехот на Трамп создаде хаос на теренот. Еден извршен директор изјави за „Фајненшл тајмс“ дека неговата компанија била принудена да ги менува царинските стапки за пратките насочени кон САД три пати за помалку од една недела.
„Губењето на довербата е долготрајно, а неизвесноста е апсолутен отров за расположението на потрошувачите“, рече тој.
Самите царини полесно паѓаат врз луксузните компании, а посилните брендови имаат повеќе простор да го ублажат влијанието со зголемување на цените. Но, во индустријата што се потпира на довербата на потрошувачите, подлабоката штета е психолошка.
„Очекуваме оваа година да бидат отворени помалку шишиња шампањ“, напиша Еруан Рамбург, генерален директор на HSBC.
Хермес плива, Гучи тоне
HSBC сега очекува органската продажба да падне за 5 проценти оваа година, во споредба со претходното очекување дека продажбата ќе остане непроменета во 2024 година.
Аналитичарите во банката ја зголемија цената на повеќето луксузни акции кон крајот на минатата година, верувајќи дека тие ќе имаат корист од зголемувањето на потрошувачката за луксузни производи, предводено од САД.
„Според наше мислење, тоа повеќе нема да биде случај“, наведуваат тие сега. Очекуваниот „благ раст“ во континентална Кина, по болната 2024 година, исто така изгледа сè поневеројатен.
Сепак, се очекува Хермес, групата што стои зад многу бараните чанти Биркин, да се снајде подобро.
Аналитичарите проценуваат дека продажбата ќе порасне за 8 проценти во првиот квартал.
Од друга страна, проблемите во „Гучи“, најголемиот бренд на „Керинг“, ја оставија групата изложена. „Барклис“ очекува продажбата на „Гучи“ да падне за 25 проценти во првиот квартал, додека „Бернштајн“ предупредува дека „Керинг“ сега „многу веројатно“ ќе ги пропушти своите прогнози за фиксни приходи и оперативна добивка во 2025 година.
