Американскиот претседател Доналд Трамп изјави дека не размислува за воздушни напади во рамките на Венецуела, отфрлајќи ги медиумските извештаи дека неговата администрација наводно идентификувала потенцијални цели поврзани со трговија со дрога.
„Тоа не е нешто што е на маса во моментов,“ изјави Трамп, додавајќи дека американската политика кон регионот останува насочена кон дипломатски притисоци и санкции.
Во исто време, венецуелскиот претседател Николас Мадуро побарал воена поддршка од Русија, вклучувајќи поправка на радарски системи, одржување на борбени авиони и потенцијална испорака на проектили, според документи објавени од Вашингтон пост.
Според анализите, ваквото барање би можело дополнително да ги продлабочи тензиите меѓу Каракас и Вашингтон, особено по најновите американски изјави за проширување на санкциите.
Бегалска криза во Судан
Во Судан, повеќе од 60.000 лица избегале од градот Ел-Фашер, откако го презеде паравоената група Rapid Support Forces (RSF).
Овој потег се смета за клучен пресврт во суданската граѓанска војна, која трае повеќе од една година и предизвикува хуманитарна катастрофа во регионот Дарфур.
Ескалација на границата меѓу Либан и Израел
Либанскиот претседател Жозеф Аун му нареди на армиското раководство да се спротивстави на секое ново израелско навлегување на либанска територија, откако израелските сили навлегле во пограничниот град Блида во текот на ноќен напад при кој загина општински работник.
Инцидентот доаѓа во момент на зголемени напнатости меѓу Израел и Хезболах, што ги зголемува стравувањата од поширока регионална ескалација.
Пентагон го одобри преносот на „Томахавци“ за Украина
Американскиот Пентагон одобри трансфер на долгoдометни проектили „Томахавк“ кон Украина, откако беше проценето дека испораката нема да ги ослаби американските резерви.
Крајната одлука сега е во рацете на претседателот Трамп, кој неодамна изјави дека не сака да ја загрози американската одбранбена готовност.
Политички пресврт во Холандија
Во Холандија, лидерот на центристичката партија D66, Роб Јетен, прогласи победа на парламентарните избори и се подготвува да стане најмладиот премиер во историјата на земјата, на 38-годишна возраст.
Јетен го порази Герт Вилдерс и неговата десничарска Партија на слободата, што се толкува како сигнал дека холандските гласачи го поддржале умерениот, проевропски курс на новата влада.
