Во Молдавија, претседателката Маја Санду предупреди дека независноста и европскиот пат на земјата се загрозени, откако полицијата уапси 74 лица обвинети за организирање немири со поддршка од Москва, само неколку дена пред парламентарните избори.
Украина во меѓувреме изврши нов напад врз петрохемискиот комплекс „Салават“ во руската република Башкортостан – втор во помалку од една недела, потврди регионалниот гувернер.
Кина најави дека повеќе нема да бара специјален третман како „развиена земја“ во идните преговори на Светската трговска организација (СТО), потег кој, според властите во Пекинг, има цел да го зајакне глобалниот трговски систем во услови на растечка протекционистичка политика.
Јапонскиот премиер Шигеру Ишиба во обраќањето на Генералното собрание на ОН порача дека признавањето на Палестина е неизбежно, остро осудувајќи го одбивањето на Израел за палестинска држава и предупредувајќи дека Токио би можел да преземе нови мерки доколку израелските власти продолжат да ги блокираат мировните напори.
Од Иран, пак, шефот на нуклеарната агенција Мохамад Еслами потврди дека американските воздушни напади во јуни оштетиле делови од нуклеарните постројки во Фордо, Натанз и Исфахан, но најави дека тие ќе бидат обновени и покрај меѓународниот притисок и заканите од Израел.
