Цените на многу уреди што секојдневно ги користиме би можеле значително да пораснат во текот на 2026 година, откако цената на RAM меморијата некогаш една од најевтините компјутерски компонентисе зголеми повеќе од двојно од октомври 2025 година наваму.
Оваа клучна технологија се користи во сè, од паметни телефони и телевизори, до медицинска опрема. Главната причина за растот на цените е огромната побарувачка од дата-центри кои ја напојуваат вештачката интелигенција, објави BBC.
Сè што користи меморија ќе поскапи
Нерамнотежата меѓу понудата и побарувачката значи дека производителите се соочуваат со повисоки трошоци, кои тешко можат да ги апсорбираат. Затоа, во најголем дел, тие се префрлаат директно врз потрошувачите.
„Нè соочуваат со цени и до 500 проценти повисоки отколку пред само неколку месеци“, изјави Стив Мејсон, извршен директор на компанијата CyberPowerPC, која произведува компјутери. Според него, моментот кога производителите ќе мора да ги зголемат крајните цени е неизбежен.
RAM меморијата, односно работната меморија, е неопходна за функционирање на речиси секој дигитален уред. Поради нејзината широка употреба, експертите очекуваат притисокот врз цените да продолжи длабоко во 2026 година.
Вештачката интелигенција како главен двигател
Според Крис Милер, автор на книгата Chip War, токму вештачката интелигенција е клучниот фактор што ја турка побарувачката за мемориски чипови, особено за високопропусната меморија што ја користат AI-системите.
Аналитичарите наведуваат дека големите облачни компании како Amazon и Google веќе ги дефинирале своите потреби за 2026 и 2027 година, а јасно е дека понудата нема да може целосно да ја задоволи таа побарувачка. Како резултат на тоа, добавувачите континуирано ги зголемуваат цените, во некои случаи и агресивно.
Потрошувачите пред тежок избор
Во персоналните компјутери, меморијата традиционално учествува со 15 до 20 проценти од вкупната цена, но моменталните цени тој удел го зголемиле на 30 до 40 проценти. Производствените маржи не се доволни за да се апсорбира овој удар.
Проценките покажуваат дека типичен лаптоп со 16 GB RAM може да поскапи за 40 до 50 долари, додека кај паметните телефони зголемувањето на трошоците може да изнесува околу 30 долари по уред – сума што најверојатно ќе ја платат потрошувачите.
Експертите заклучуваат дека купувачите во 2026 година ќе мора да изберат: да платат повисока цена, да се задоволат со уреди со послаби перформанси или да продолжат да користат постара технологија уште некое време.
